د کرنې، اوبو لګولو او مالدارۍ وزارت له لوري کابل کې د کرنیزو او مالدارۍ د محصولاتو ۳۱ نندارتون کې کرنیز توکي، پروسېس شوي تولیدات، د مالدارۍ وسایل، لاسي صنایع، طبي بوټي، د اوبو لګولو وسایل، د لمریزې برېښنا تولیدوونکي ماشینونه، مېوه لرونکي او بې مېوې نیالګي او نور وسایل نندارې ته اېښودل شوي چې په تېرو درېیو ورځو کې ترې زرګونه کسانو لیدنه کړي.
د کرنیزو محصولاتو ۳۱ نندارتون د معیاري تولید ( نړیوال بازار ته لاسرسي) تر سرلیک لاندې د کابل په بادام باغ کې جوړ شوی.
که څه هم متشبثې ښځې په دې نندارتون کې د خپلو محصولاتو له پلور خوښې دي خو وایي، د بازار موندنې په برخه کې له ګڼو ننګونو سره مخ دي او له اسلامي امارت غوښتنه کوي چې د دوی ملاتړ سربېره دې په نړیوالو بازارونو کې د توکو لپاره بازار موندنه وکړي.
عارفه علیزاده وايي: « له اسلامي امارت غوښتنه کوم چې موږ له هېواد بهر نندارتونو ته یوسي، ترڅو خپل محصولات هلته وپلورو.»
متشبثه پریګل نظري وايي: «غوښتنه کوم چې دا ډول نندارتونونه پرله پسې جوړ شي او له خلکو هم غوښتنه لرم چې راشي له نندارتونه لیدنه وکړي او زموږ توکي وپېري، ترڅو د لاسي صنایعو جوړوونکو ښځو ملاتړ وشي.»
متشبثه محبوبه بیا وايي:« ډېر خلک د پېرلو وس نه لري، نو دولت باید له متشبثو سره مرسته او همکاري وکړي ترڅو تولید کړي توکي په ټیټه بیه بازار ته وړاندې کړي.»
په دغه نندارتون کې غرفه لرونکي په کور دننه او بهر د ورته نورو نندارتونونو د جوړېدو غوښتنه کوي او وایي، اسلامي مارت دې نندراتونونه په ګاونډیو هېوادونو کې هم جوړ کړې، ترڅو د دوی له تولید سره بهرني وګړې هم آشنا شي او بازار پيدا کړي.
دوی زیاتوي، اسلامي امارت باید د هغو محصولاتو او تولیداتو له واردېدو مخنیوي وکړي چې په کور دننه تولیدیږي.
د دوی په خبره، له ګاونډیو هېوادونو افغانستان ته ځیني داسې توکي واردیږي چې دلته په کور دننه هم تولیدیږي او باید مخنیوی یې وشي.
غرفه لرونکی احمد منیر وايي: « موږ باید په یوه هېواد او یوه لاره تکیه ونه کړو بلکې له ټولو ګاونډیانو سره لارې ولرو. له حکومته غوښتنه کوو چې له ګاونډیانو سره داسې تفاهم وکړي چې له مخې یې تعرفې صفر شي.»
همدارنګه غلام علي د بهرنیو توکو د وارداتو مخنیوی غواړي او وايي: «دلته ډېر ایراني او پاکستاني محصولات راځي او زموږ د خپلو محصولاتو نوم بدوي؛ که څه هم د بهرنیو توکو کیفیت ټیټ وي، خو زموږ خلک د کیفیت تشخیص نه شي کولی او افغاني توکي بې کیفیته بولي.»
په ورته مهال، د کرنې اوبولګولو او مالدارۍ وزارت ویاند مصباح الدین مستعین وایي، تېرو درېیو ورځو کې زرګونه خلکو له دې نندارتون لیدنه کړې او په خبره یې، د کرنې میکانیزه کېدو، کرنیزو توکو ته بازار موندنې، د کروندګرو ملاتړ او د هېواد د اوبو مدیریت لپاره هڅې روانې دي.
مستعین زیاتوي: « د کورنیو نندارتونونو په څېر هڅه کېږي چې له هېواد بهر جوړېدونکو نندارتونونو کې هم زموږ تاجران او پانګوال ګډون ولري او په هېواد کې تولید شوي توکي نندارې ته وړاندې کړي. روان کال داسې ډېرو هېوادونو ته د افغانستان صادرات پيل شوي یا یې د پيل کېدو پړاوونه پيل شوي چې له دې وړاندې موږ هلته صادرات نه لرل.»
د کابل په بادام باغ کې د کرنیزو او مالدارۍ اړوند توکو ۳۱ نندارتون درې ورځې پوره شوې، په دې نندارتون کې ټولې ۲۳۶ غرفې اېښودل شوې چې ۵۶ یې ښځو ته ځانګړې دي.
