د پکتیا پوهنتون تدرسي روغتون کې چې له نږدې یو کال وړاندې یې په فعاليت پیل کړی، د ناروغانو درملنه اسانه شوې ده.
د دې روغتون مسوولین وایي، د طب پوهنځي محصلینو پر عملي روزنې سربېره هره ورځ په بېلابېلو برخو کې خلکو ته روغتیایي خدمتونه وړاندې کوي.
د روغتون مسوولین ډاډ ورکوي چې د روغتون لا سمبالولو لپاره به په نږدې راتلوونکي کې د شاوخوا ۸۹ میلیونه افغانیو په ارزښت بېلابېل طبي وسایل وپیري او ورسره به د یاد روغتون په خدماتو کې د پام وړ پراختیا راشي.
د پکتیا پوهنتون رییس عبدالحکیم حمدي وايي: « موږ روان کال شاوخوا ۸۸ میلیونه، ۶۰۰ زره افغانۍ د طب پوهنځي او د کادري روغتون د وسایلو پېرلو او پرسونل لپاره منظورې کړې دي. راتلونکې بودیجه کې به د دغو وسایلو د خرید او اړتیاوو پوره کولو کارونه ترسره شي.»
د طب پوهنځي محصل رضا محمد پر پوهنتون د نورې پانګونې غوښتنه کوي او وايي: «پکتیا پوهنتون اوسمهال ډېر زیات محصلین لري. هرڅومره چې دغه روغتون ته ډېره پاملرنه وشي، د محصلینو علمي کیفیت او ظرفیت به ورسره لوړ شي.»
ورته مهال، یو شمېر ناروغان او ناروغ لرونکي که څه هم په پکتیا کې د تدریسي روغتون له فعالیت او رامنځته شویو اسانتیاوو خوښ دي، خو هیله لري چې د مرکز ګردېز په ګډون دې لرې پرتو سیمو کې هم خلکو ته روغتیايي خدمات او اسانتیاوې زیاتې شي، ترڅو خلک په دې برخه کې له شته ستونزو وژغورل شي.
د پکتیا اوسېدونکی راشد وايي: «باید کارونه نور هم ښه او اسانتیاوې ډېرې شي.»
همدارنګه د دې ولایت بل اوسېدونکی نور احمد بیا وا يي: « پخوا په مرکز ګردېز کې هم روغتیايي خدمتونه کمزوري وو، خو اوس څه نا څه ښه شوي. له حکومته غوښتنه کوو چې لرې پرتو ولسوالیو کې هم روغتیايي خدمتونو ته پاملرنه وکړي ترڅو خلک مجبور نه شي چې د درملنې لپاره مرکز ته راشي.»
دا مهال پکتیا پوهنتون په تدریسي روغتون کې ۱۰۸ تنه د روغتیایي خدمتونو بوخت دي او هره ورځ شاوخوا ۴۰۰ تنو ناروغانو ته په شپږو بېلابېلو برخو کې روغتیايي خدمات وړاندي کوي.
د مسوولینو په خبره، د کاري ډلې او طبي وسایلو په زیاتېدو سره به د خپلو خدمتونو لمن نوره هم پراخه او کارونه به چټک کړي.
