راپورونه وايي، د پاکستان په ډېرو سيمو کې د تحریک طالبان پاکستان ( ټي. ټي. پي) له خوا د پاکستانې پولیسو په امنیتې پوستو او قرارګاوو بریدونه ډېر شوي او په ځینو سېمو کې پولیسو خپلې پوستې پرېښې، وسلې، مهمات او وسایط يې هم د (ټي.ټي.پي) لاس ته لوېدلي دي.
په پاکستان کې د روان امنیتي او سیاسي وضعیت په تړاو ډول ډول تبصرې کيږي. د پوځي چارو شنوونکي وايي، په دغه هېواد کې امنیتي وضعیت او له دندو د امنیتي ځواکونو تښتېدلو هلته سیاسي ثبات ننګولی او د نظام پاشلو اندېښنې یې زیاتې کړي دي.
دوی وايي، د یاد هېواد پوځ د ولس پر وړاندې زور زیاتی ډېر کړی او دغه چلن د پاکستان لپاره بدې پایلې لرلی شي.
د پوځي چارو شنونکی اختر محمد راسخ وايي: « دا د پاکستاني جنرالانو او استخباراتي کړیو د کارونو پایله ده چې دغه هېواد یې له تجزیې سره مخامخ کړی. پښتنو او بلوڅانو خپل دوښمن پېژندلی؛ دا چې اوس د پاکستان د پوځ یو شمېر سرتېري او چارواکي د خپل قوم ترڅنګ دریږي او د پوځ له لیکو وځي، ویلی شم چې دا به د یوه لوی تحول سبب شي.»
د پوځي چارو شنونکی ظاهر بهاند وايي: « لومړی علت له ولس سره د پاکستان د پوځ ناوړه چلن دی؛ دویم علت په دغو سیمو کې د ټي.ټي.پي د فعالیتونو له امله د پوځ او پولیسو اړوند کسانو خپلې دندې پرې اېښې او په کور ناست دي.»
ورته مهال، پاکستان کې مېشت ځینې خبریالان هم تایيدوي چې پښتونخواه او د پاکستان په ځینو سېمو کې یو شمېر پولیسو د وژلو له ویرې دندې پريښې دي او له لاریون کوونکو سره یو ځای شوي دي.
د دوی په خبره، لوړ پوړي چارواکي د عسکرو ستونزې نه اوري او اړ دي چې دندې پریږدي او امن سېمو ته ځانونه ورسوي.
آزاد خبریال طاهر خان وايي: «د خیبر پښتونخوا په لکي مروت کې چې پولیسو کوم احتجاج وکړ او وویل چې په پولیسو بریدونه زیات شوي، دا احتجاج د دې لپاره و چې هغوی ځانونه خوندي نه بولي. پولیسو په خپل احتجاج کې ویل چې کله پر دوی برید وشي، نو د نا معلومو کسانو نوم ورکول کېږي حال دا چې دا کسان ټول پېژني او هرڅوک پوهېږي چې بریدونه څوک کوي.»
له تېرو څو ورځو راهیسې په ټولنېزو رسنیو کې ځینې ویډیوګانې لاس په لاس کیږي چې ښيي پاکستاني پولیس د هغو ولسي لاریونوالو سره یو ځای کیږي چې د پوځ د ظلمونو پر ضد بلوچستان کې را پورته شوي دي.
ځینې پولس افسران چې خپله لاره یې جلا کړې د عامو خلکو پر وړاندې د پوځ ظلمونه تایيدوي او وايي، د پاکستان پوځ کور په کور جګړه پيل کړې او په بېلابېلو پلمو عام خلک وژني او شکنجه ورکوي یې.
د پاکستاني پولیسو له صف یو جلا شوی افسر وايي :« زه د پاکستان پوځ او استخباراتي ادارې ته وایم چې دا به ستاسو له خوا وروستی کس وي چې وژل کېږي، د نورو کسانو د وژلو اجازه نه درکوو.»
د پوځي چارو شنونکو په خبره، د پاکستان حکومت نه یوازې له امنیتي او سیاسي ستونزو سره مخ دی بلکې په دغه هېواد کې اقتصادي ناسم وضعیت او دغه راز د پوځ او څارګرې ادارې ځینې کړنې هلته د نظام پاشلو امکان ډېروي او عادي کول یې په میاشتو او آن څو کلونو کې ناشونی کار دی.
