په داسې حال کې، چې سرپرست حکومت په نږدې راتلونکي کې د ټاپي پروژې د عملي چارو پيل کېدو خبره کوي، ورسره څنګ کې کابل او عشق آباد د يو لړ نورو ګډو پروژو پر پلي کولوهم هوکړې ته رسېدلي.
د بهرنيو چارو وزارت سرپرست مولوي امیرخان متقي وايي، په دې پروژو کې د انتقالاتو لپاره د تأسيساتو جوړول، په کور دننه د انرژۍ توليد، د هرات- تورغونډۍ ترمنځ د اورګاډي کرښې جوړول او د همدې کرښې په وسيله له هرات سره د کندهار او چمن وصلول شامل دي.
مقتي ډاډ ورکړی، چې د ټاپي پروژې د عملي کارونو له پيل وروسته به د يادو پروژو چارې هم پيل شي.
متقي زیاتوي:« دا مهال د ترکمنستان د اورګاډي پټلۍ تر تورغونډۍ پورې را رسېدلې ده. اوس به ترکمنستان لوری په دوو پروژو کار کوي، لومړی دا چې په تورغونډۍ کې به صفري نقطې ته نیږدې د اورګاډي د بارولو او تخلیې لپاره لوی تأسیسات جوړوي او دویم به له تورغونډۍ څخه د اورګاډي دغه پټلۍ تر هرات ښار پورې غځوي.»
مقتي وايي، سره له دې، چې د کابل او عشق آباد ترمنځ د انرژۍ پر توليد هوکړه شوې، خو ترکمنستان به د انرژۍ د کمښت پوره کولو لپاره افغانستان ته برښنا ورکوي.
د نوموړي په خبره، د ترکمنستان وارداتي برښنا له لارې به په افغانستان کې د برښنا د پوښښ ساحه پراخه شي.
متقي زیاتوي: « بله مهمه پروژه د برښنا ده. دغه پروژه په دوو برخو وېشلی شو؛ یوه برخه هغه برښنا ده، چې دا مهال افغانستان ته راځي او هرات کې وېشل کېږي، خو دا برښنا کمه او کمزورې ده. هلته د نور الجهاد په نوم یو قوي سب سټېشن ورته جوړ شوی او په راتلونکو څو ورځو کې به په فعالیت پيل وکړي او ورسره به هغه برښنا څو چنده قوي او زیاته شي چې هرات ته راځي.»
د اقتصادي چارو کارپوهان د افغانستان او ترکمنستان ترمنځ يادې ګډې اقتصادي پروژې حياتي بولي او ډاډ ښيي، چې د دې پروژو په تطبيق سره به افغانستان يو ګام نور هم پر ځان بساينې ته نږدې شي.
د اقتصادي چارو کارپوه محمد يونس ځدراڼ وايي: « د دې پروژو په پلي کېدو سره به د افغانستان ګڼ شمېر وګړو ته په مستقیم او غیر مستقیم ډول د کار زمینه برابره شي. همدارنګه د برېښنا په کچه کې به زیاتوالی راشي او ورسره به زموږ د سوداګرو ستونزې هوارې شي. د هرات، کندهار او چمن ترمنځ د رېل کرښه به د دغو ښارونو ترمنځ واټن را کم کړي.»
مقتي وايي، د یادو پروژو په پلي کېدو سره به د مالي ګټو تر څنګ د سېمې هېوادونو سره مثبتې اړيکې نورې هم ټینګې شي او په اقتصادي برخه کې به د افغانستان ډېرې ستونزې هوارې کړي.
