د کرېکټ ملي لوبډلې د شل اووريزو لوبو لوبډلمشر او د کرېکټ ځلانده ستوری راشد خان له څلور کلن ځنډ وروسته هېواد ته راستون شو.
د ملي لوبډلې دا پیاوړی لوبغاړی وايي، په تمرينونو او ليګونو کې د زياتې بوختيا له امله له خپل هېواد دباندې و او خوښ دی چې له څلور کلن سفر وروسته بېرته هېواد ته راستون شوی.
راشد خان چې د هند کورني کرېکټ سياليو (آی.پي.ایل) کې له لوبیدو اوزګار شوی وايي، څو ځلې يې هېواد ته د ستنېدوهوډ وکړ؛ خو د بوخت مهالوېش له امله يې افغانستان ته راتګ ځنډېدلی و.
راشد خان وايي: « خوښ یم چې ډېره موده وروسته خپل هېواد ته راغلم او خپلو هېوادوالو سره یم، تل مې زړه غوښتل راشم خو د یو لړ ستونزو او بوختیاوو له امله مې ونه شو کولی راشم؛ نو اوس ډېر خوښ یم چې خپل هېواد ته راغلم.»
راشد خان، د پاکستان پر وړاندې په تېر ۵۰ اوریز نړيوال جام کې بريا د ځان لپاره نه هېردونکې بولي.
نوموړی ډاډ ښيي، چې د تېر نړيوال جام په څېر به په راتلونکي۲۰ اوریز کرېکټ نړيوال جام کې هم د مقابلو لوبډلو پر وړاندې ښې لوبې ترسره کړي.
هغه وايي: « تل د هر لوبغاړي همدا هڅه او هیله وي چې موږ په میدان کې ښه وځلېږو، کله هم چې هېواد کې خوښي وینو موږ لا زیات خوشالېږو، په ځانګړې توګه کله مو چې تېر نړیوال جام کې لوبه وګټله او ورپسې مو له پاکستانه لوبه وګټله او تر ننه موږ په خپلې هغې بریا خوښ یو.»
په ورته مهال د افغانستان بیسم مخابراتي شرکت، د کرېکټ ملي لوبغاړی او ورو توپ اچونکی راشد خان د يوې غونډې په ترڅ کې په رسمي توګه د ياد مخابراتي شرکت د سفیر په توګه ونوموه.
د افغان بیسم مخابراتي شرکت اجرائیوي مشر علي سروري وايي: « راشد خان ستاسو د ټولو خوښ دی او د ټولو افغانانو خوښ دی، نن دا دی الحمدالله موږ او تاسې سره په دې کاروان او مسیر کې ملګری دی.»
د افغانستان د کرېکټ ۲۰ اوریزه لوبو لوبډلمشر راشد خان وايي، د نړيوال ۲۰ اوریزه جام لوبو ته پوره چمتووالی لري او تمه ښيي چې په يادو لوبو کې به د مقابلو لوبډلو پر وړاندې برياوې خپلې کړي.
ټاکل شوې ده، د امريکا او ويسټنډیز په ګډ کوربتوب، د ۲۰ اوریز جام سيالۍ د روان کال د جون مياشتې په دويمه د امريکا او کاناډا په لومړۍ لوبې سره پیل شي او افغان لوبډله د ګروپې لوبو په مرحله کې څلور لوبې ترسره کړي، چې لومړۍ لوبه به د يوګنډا، دويمه نيوزلنډ، درېيمه د فينجي او وروستۍ څلورمه لوبه د کوربه وسټ انډيز پر وړاندې وي.
