د فلسطین روغتیا وزارت ویلي، د بريدونو له پيل تر دې مهاله د اسرائیلي ځواکونو په بریدونو کې څه باندې ۳۴ زره کسان وژل شوي او زرګونه نور ټپیان دي.
دغه وزارت زیاته کړې، له څه باندې دوو اوونیو راهیسې چې اسرائیلي ځواکونه د غزې له سویل خان یونس ښار وتلي، نږدې ۳۰۰ جسدونه په ډلیزو قبرونو کې موندل شوي دي.
د راپورونو له مخې، اسرائیلي ځواکونو یوازې د روانې اوونۍ په لړ کې د غزې په ختیځ خان یونس، نصرت پنډغالي او یو شمېر نورو سیمو مرګوني هوايي بریدونه کړي، چې له ۵۰ زیات کسان یې وژلي او لسګونه نور یې ټپیان کړي دي.
راپورونه کاږي، په يادو وژل شویو کسانو کې یوه مېندواره ښځه او شپږ ماشومان هم شامل دي.
له دې سره امریکايي چارواکو، چې تازه د دې هېواد له استازو جرګې څخه اوکرائین، اسرائیلو او تایوان ته د ۱۲۹ میلیارډ ډالرو مرستې لایحه تصویب شوې ویلي، د اسرائیلو ملاتړ او خوندیتوب ته دوام ورکوي او په غزې کې د بشري ناورين له کمولو سره هم مرسته کوي.
د امریکا بهرنیو چارو وزیر انټوني بلېنکن وايي:« د اسرائیلو له دفاع وزیر یو آف ګالانت سره مې د اسرائیلو د امنیت ساتلو، د یرغمل شویو کسانو د ازادېدو او غزې ته د بشری مرستو د رسولو او همدارنګه په سیمه کې کړکېچونو د راکمولو په اړه خبرې وکړې. د اسرائیلو پر پوځي ملاتړ سربېره په غزې کې اوربند به وکولی شي، د برمته کسانو د ازادېدو لپاره لاره هواره او په سیمه کې د روانو کړکېچونو د زیاتوالي مخنیوی وکړي.»
پراسرائیلو د ایران له برید وروسته د اروپايي ټولنې د بهرنیو چارو وزیرانو پر ایران د نویو بندیزو هوکړه کړې.
د دغې ټولنې د بهرنیو اړیکو مسوول ویلي، پر ایران د بندیزونو له پراخېدو سربېره په غزې کې ناوړه بشري وضعیت ته لاسرسی او ثبات اړین دی.
د اروپايي ټولنې د بهرنیو اړیکو مسوول جوزف بورېل وايي:« اروپايي ټولنه اوس مهال پر ایران وسلهوالو ډلو ته د ډلهییزو وژنې لپاره د وسلو لېږلو، د بشري حقونو د سرغړونو او روسیې ته د بېپیلوټه الوتکو د ورکړې په تړاو د بندیزونو څو پروګرامونه لري او هم په غزې کې بشري وضعیت نشو هېرولی. موږ اړ یو، چې ټول یرغمل شوي ازاد او اوربند رامنځته شي، څو د بشري ناورین مخنیوی وشي.»
له دې سره د ایران بهرنیو چارو وزیر د اروپايي ټولنې له خوا د نویو بندیزونو په غبرګون کې ویلي، اروپایي ټولنه دې د ایران پر وړاندې بېړنی تصمیم نه نیسي او نه دې هم د امریکا پېروي کوي.
د ایران بهرنیو چارو وزیر حسین امیرعبداللهیان وايي:« زه متاسف یم چې اروپايي ټولنه پر اسرائیلو د ایران حقه ځوابي برید پر وړاندې بېړنی تصمیم نیسي. د دې ټولنې غړي دې د امریکا پېروي نه کوي او نه دې په دې سره د اسرائیلو ملاتړ کوي، چې په غزې کې نسل وژنې ته يې دوام ورکړی.»
ایران وروسته له هغې پر اسرائیلو سلګونه د بې پیلوټه الوتکو او توغندیو بریدونه وکړل، چې دغه هېواد په سوریې کې د ایران پر کونسلګرۍ برید وکړ او د دوو ایراني پوځي قوماندانانو په ګډون يې ۵ تنه ايراني پوځيان ووژل.
