پر اسرائیلو د ایران بریدونو نړیوال غبرګونونه پارولي او ځینو زبرځواکو هېوادونو د ایران او یو شمېر نورو د اسرائیلو ملاتړ کړی دی.
د روسیې ولسمشر ولادیمیر پوتین خبرداری ورکړی، د اسرائیلو او امریکا لخوا پر ایران برید به روسیه د ایران ملاتړ ته اړه کړي.
پوټین وايي:« که امریکا وغواړي، چې د اسرائیلو د ملاتړ لپاره د جګړې ډګر ته را ووځي، موږ به هم غلي پاتې نه شو.»
خو د امریکا ولسمشر جو بایډن د اسرائیلو له لومړي وزیر بنیامین نتانیاهو سره په ټلیفوني خبرو کې ویلي، چې امریکا پر ایران د اسرائیلو ځوابي برید ملاتړ نه کوي .
ورته مهال د ایران د وسله والو ځواکونو لوی درستیز ویلي د اسرائیلو پر ضد عملیات پایته رسېدلي او تراوسه د بل برید هوډ نه لري.
د ایرنا خبري اژانس د راپور له مخې هغه ویلي، د برید لامل یې د اسرائیلو د برید ځواب و چې دوی ته سره کرښه وه او دوی یې زغم نه درلود.
په ملګرو ملتونو کې د ایران دایمي استازي ویلي، پر اسرائیلو برید یې د ملګرو ملتونو منشور د ۵۱مې مادې په رڼا کې و.
هغه زیاته کړې:« دا موضوع دې تړلې وګڼل شي. که اسرائیل بله تېروتنه وکړي، د ایران ځواب به له دې هم سخت وي.»
د ایران ګاونډی هېواد افغانستان چې له خونړۍ جګړې راوتلی او پر فلسطینیانو د اسرائیلو بریدونه یې غندلي نیوکه یې کړې چې اسرائیلو نسل وژنې ته دوام ورکړی دی.
د بهرنیو چارو وزارت په اعلامیه کې راغلي، د تېر کال له اکټوبر وروسته تر اوسه اسرائیلو په غزه کې تر ۳۳ زرو زيات ملکيان وژلي او نسل وژنه یې کړې.
د خبرپاڼې یوه برخه:« اسرائیلو په غزې کې د نسلوژنې پر دوام سیمه کې د نورو هېوادونو د حريم د نقضولو او د ناامنۍ پراخولو د پاروونکو اقداماتو هڅه کړې، چې په غزې کې له خپلو جنايتونو د نړۍ پام په بله واړوي. د افغانستان اسلامي امارت د نړۍ او سیمې پر ټولو مؤثرو هېوادونو غږ کوي چې د کړکېچ د لا پراختیا د مخنیوي لپاره د صهیونستي رژیم د جنایاتو د درولو په موخه خپلې هڅې ګړندۍ کړي.»
پر اسرائیلو د ایران لهخوا تر توغندیزو بریدونو وروسته چین ویلي، په منځني ختیځ کې د کړکېچ له زیاتېدو اندېښمن دی.
رویټرز د چین د پوځ د اعلامیې له قوله لیکلي، پر اسرائیلو د ایران برید د یوې لویې جګړې خطر زیات کړی دی.
اعلامیه کې راغلي، دغه هېواد پر دواړو لورو غږ کوي چې ارام پاتې شي او د کړکېچ د زیاتېدو مخه ونیسي.
خو د العربیې د خبر له مخې د اسرائیلو د لومړي وزیر پر مشرۍ د دغه هېواد د جنګ کابینې پر ایران د متقابل برید لپاره پریکړې ته نه دي رسیدلي.
