د ریاست الوزرا اقتصادي مرستیالۍ وايي، د ملي تدارکاتو کمېسیون د هېواد پر کچه ۱۴۲ بېلابېلې نوې او نیمګړې پروژې په بېلابېلو سکټورونو کې د ۴۰ میلیاردو افغانیو په ارزښت منظورې کړې دي.
د یادې مرستیالۍ په خبره، یادې ټولې پروژې د ازادې دوطلبۍ له لارې په پوره روڼتیا سره اعلان ته سپارل شوي، چې له مخې به یې زرګونه هېوادوالو ته د کار زمینه برابره شي.
اقتصادي مرستیالۍ زیاتوي: « د ملي تدارکاتو کمېسیون لخوا د ۴۰ ملیاردو افغانیو په ارزښت ۱۴۲ بېلابېلې او نیمګړې پروژې د ازادې داوطلبۍ له لارې اعلان ته سپارل شوې دي. دا پروژې د روغتیا، برېښنا، ټرانسپورټ، کرنې او د کلیو پراختیا، مخابرات، بنسټیز سکټور او د څښاک اوبو او د ښارونو اړوند بنسټیزو خدمتونو د سکټورونو په برخه کې دي، چې په تطبیق کې به یې د کورنیو تولیداتو کارولو ته لومړیتوب ورکړل شي.»
د اقتصاد وزارت مسلکي معین عبدالطیف نظري وایي، حکومت هڅه کوي چې د یادو پروژو لپاره کافي بودیجه ځانګړې کړي، ځکه دا ډول پروژې د اقتصادي ودې لامل کېدای شي.
نظري زیاتوي: « هغه پروژې چې د ملي تدارکاتو له لوري منظور شوې، ټولې د خلکو ستونزو د له منځه وړلو او ځان بسیاینې ته د هېواد د رسېدنې لپاره دي. اسلامي امارت هڅه کوي چې دې پروژو ته بودیجه په پام کې ونیسي، په ځانګړې توګه د بیخ بینايي پروژو برخې ته چې کولی شي د هېواد د اقتصادي وضعیت د ښهوالي لپاره ګټورې تمامې شي.»
د اقتصادي چارو شنونکو په اند، دا پروژې به د افغانستان اقتصادي اړتیاوې په نسبي توګه پوره کړي او له اقتصادي بحران سره مخ افغانستان به د ځان بسیاینې لور ته سوق کړي.
د اقتصادي چاروشنونکی محبالله شریف وايي: « تر ټولو مهمه یې په روغتیا، د کلیو پراختیا ترڅنګ یې پرېښنا، مخابراتو او همداراز د ښارجوړونې او د څښاک پاکو اوبو په برخه کې به دا نه یوازې دا، چې د افغانستان اوسنۍ اړتیاوې به تر یوه حده پورې کمې کړي، بلکې د خلکو لپاره به په بېلابېلو برخو کې کاري زمینې برابرې شي او خلک به دندې وموندلی شي، ترڅنګ به یې دغه ټولې پروژې د کال په پای کې د افغانستان د ملي اقتصاد د پراختیا او ځان بسیاینې لپاره تر ټولو مهم ګامونه وبلل شي.»
د اقتصادي چارو شنونکی لعل ځاځی وايي: « خلکو ته به کاري زمینه برابره کړي، د ابادۍ په برخه کې به ښه رول ولوبوي او ناوړه اقتصادي وضعیت به له منځه لاړ شي، ترڅنګ یې د دغو پروژو په پلې کېدو سره به هغه شرکتونه چې فعالیت یې نه درلوده هم دغو پروژو کې فعاله شي او اقتصادي لړۍ په چلولو کې به ښه همکاري وکړي.»
