د افغانستان او ازبکستان ترمنځ د ټرانزیټ او سوداګریزې راکړې ورکړې برخه کې له شته فرصتونو د استفادې او ستونزو حل په موخه نن د کابل په سرینا هوټل « د افغانستان او ازبکستان ترمنځ د سوداګریز پیوستون» ترعنوان لاندې کنفرانس کې دواړو خواوو پر مهمو مسایلو چې د سوداګرو پرمخ پرتې دي؛ بحث او خبرې وکړي.
د سوداګرۍ او صنایعو وزارت معین قدرت جمال وايي: « سوداګري هغه وخت بریالۍ وي چې تګ راتګ وي او د تګ او راتګ لپاره اوس وسیله ویزه ګرځېدلې ده، که د افغانستان سوداګرو ته په خپل وخت ویزې ورکړل شي او ژر تر ژره ورکړل شي؛ نو زما په نظر په سوداګرۍ کې به زیات پرمختګ وشي او راتلونکې کې به په دغسې غونډو کې موږ او تاسې په هغو موضوعاتو بحث کوو، چې څومره پرمختګونه مو کړي او دا ستونزې به بیا نه یادېږي.»
په دغه کنفرانس کې د دولتي او خصوصي سکتورغړو د سوداګرو د ویزو برخه کې له ځنډ سربېره د افغانستان د صادراتو ټيټه کچه او په حیرتان بندر کې د دواړو هېوادونو د ګدې استازوالۍ فعالولو نه موجودیت لویه ننګونه یاده کړه او پر حل یې ټینګار کړی.
د صنعت او سوداګرۍ خونې مرستیال یونس مومند وايي: « په سوېلي اسیا کې برېښنا، پمبې او د ډبرو سکرو ته اړتیا ده، موږ کولی شو چې سره یو ځای پر ګډه د افغانستان او ازبکستان برېښنايي زېربنايي پروژو په برخه کې خپل کار پیل کړو. زما په نظر ناستې هم زیاتې شوې، د جمهور رئیس ښاغلی مرستیال نږدې درې میاشتې وړاندې راغلی و، هغه ته مو هم ډاډ ورکړ او اوس هم د سوداګرۍ خونې د رهبرۍ له لارې بیا هم ډاډ درکوو چې افغانستان د سیمې او نړۍ د پانګونې لپاره امن ځای دی.»
د «افغانستان او ازبکستان ترمنځ د سوداګریز پیوستون» کنفرانس کې د افغانستان خصوصي سکتور استازو او ازبکستاني چارواکو دا او ورته ګډې ناستې مهمې یادې کړې او ټینګار یې وکړ، چې دواړه دولتونه دې د ترانزیټ، سوداګرۍ او اقتصادي ودې لپاره د شته ستونزو حل او فرصتونو د نه ضایع کېدو لپاره کوټلي ګامونه واخلي.
کابل کې د ازبکستان سفیر خواجه یادګار شادمانووف وايي: « موږ محسوس کړې چې افغانستان کې د پخوا پرتله امن دی او دا باور موجود دی چې د دواړو هېوادونو اړیکې تر بل هر وخت ښې شوي دي. همدا راز د ترانزیټ، سوداګرۍ، اقتصادي او تجارتي ټرانسپورټ برخو کې ښې اړیکې جوړې شوې دي او ډاډ ورکوم، چې د ویزې برخه کې به د افغان سوداګرو ستونزې ژر حل کړو.»
ورته مهال له ازبکستان څخه کابل ته راغلي پلاوي وویل، که سرپرست حکومت ورته د پانګونې برخه کې سهولتونه او پر خامو موادو سربېره یوه ځانګړې پالیسي برابره کړي، ازبکستاني پانګوال اماده دي چې د خپلو کارخونو نمایندګۍ افغانستان ته را انتقال کړي.
د ازبکستان د صنعت او سوداګرۍ خونې مشر یارکین ماليکفووف وايي: « ازبکستان کې پانګوال لېواله دي چې افغانستان کې په بېلابېلو برخو کې پانګونه وکړي او له افغان چاروکو څخه په دې برخه کې غوښتنه کوو، چې د بهرنۍ پانګونې د جلب لپاره اړین سهولتونه برابر کړي.»
کابل ته له تاشکند دا ګډ پلاوی داسې مهال سفر کوي چې ورمه ورځ د افغانستان د سوداګرۍ وزیر پر مشرۍ یو لوړپوړی پلاوی چې د خصوصي سکتور شاوخوا ۲۰تنه استازي هم په کې شامل وو، د ترکمنستان پلازمېنې ته یو نړیوال سوداګریز نندارتون کې د ګډون لپاره تللي او ډاډ یې ښودلی چې سفر به یې له لاسته راوړنو ډک وي.
