په پاکستان کې یوې ادارې ادعا کړې، چې د افغانستان په کونړ ولایت کې یوه ۱۲ کلنه نجلۍ پر ګوزڼ ناروغۍ اخته شوې ده.
خو دعامي روغتیا وزارت سرپرست قلندر عباد د یوه خبري کنفرانس پر مهال وویل، د اسلام اباد د (اېن.آی.اېچ) ادارې دغه ادعا رد کړه او د دې ادارې ارزونې يې له حقیقت لرې وبللې.
عباد وايي، د عامي روغتیا وزارت صحې ټیمونه سیمې ته تللي او یاده پېښه یې څېړلې او په خبره یې د څېړنو پايلو ښودلې چې دا پېښه له ګوزڼ سره هېڅ تړاو نه لري.
عباد زیاتوي: « د دې ادارې په اړه به په څرګندو ټکو ووایم چې اسلام اباد کې د (اېن.آی.ایچ) په نوم ادارې د ادعا په اړه پرون ما پخپله د پاکستان عامې روغتیا له وزیر سره ټیلیفوني اړیکه ونیوله، موضوع مې ورسره شریکه کړه او په کلکو ټکو مې ورته وویل، چې (اېن.آی.اېچ) اداره د کومو اصولو له مخې داسې غېر مسوولانه کارونه کوي؛ خو هغوی خپله هم نیوکه وکړه یعنې پاکستان د عامې ورغتیا وزیر خپله وویل چې د (اېن.آی.اېچ) اداره هېڅ دا مسوولیت نه لري چې له رسنیو یا خلکو سره په خپل سر داسې موضوعات شریک کړي؛ بلکې د دوی مسوولیت دا دی چې پاکستان کې (اېن.او.سي) ده او که د عامې ورغتیا وزارت د پولیو لمنځه وړلو لپاره باید کار وکړي، ځکه دا ناروغي اوس یوازې په پاکستان او افغانستان کې پاتې ده.»
عباد د پولیو په برخه کې له ټولو نړيوالو مسوولو ادارو غواړي، چې د عامي روغتیا له وزارت سره دې پر ګډه د پولیو په له منځه وړلو کې همکاري زیاته کړي.
دغه راز عباد وايي، په تېر ۲۰۲۳ کال کې په هېواد کې د ګوزڼ شپږ مثبتې پېښې ثبت شوې او په خبره يې د ګوزڼ پر وړاندې د عامې روغتيا وزارت جدي مبارزه دوام لري.
هغه زیاته کړې: « د راروانې فبرورۍ میاشت تر ۵ یا ۶مې نېټې پورې به موږ د یوه لابراتوار پرانېستنه هم وکړو چې له مخې به یې ټول معاینات په هېواد کې دننه ترسره کوو او نوره نړۍ او هلته مېشت کسان به نور په دې برخه کې کوم رول نه لري. دا لابراتوار به د پولیو په له منځه وړلو کې له موږ سره لویه همکاري وکړي.»
عباد دغه راز د یونېسف هغه ادعاوې هم بې بنسټه وبللې، چې ګواکې په هېواد کې دمګړۍ ۹.۵ میلیونه وګړي روغتیايي خدماتو ته لاسرسی نه لري.
د عباد په خبره، عامي روغتیا وزارت د هېواد ټولو وګړو ته صحې خدمات رسولي او له اړوندو ادارو غواړي چې د ارقامو خپرولو کې له دقت کار واخلي.
هغه زیاتوي: « له یونېسفه تاسې دا پوښتنه وکړئ او په دې تړاو مرکه ورسره وکړئ چې وروره تاسې دا خبره خپره کړې، له تاسې سره کومه ځانګړې ډیټا موجوده ده؟ په دې اړه مو کومه څېړنه یا مطالعه کړې ده؟ د افغانستان په کومو سیمو کې تاسې ګرځېدلي یاست؟ چې ارقام راټولوئ او بیا یې خپروئ؛ نو زما په نظر دا هم یو غېر مسوولانه له حقایقو لرې راپور دی او موږ یې ردوو.»
قلندرعباد زیاته وايي، په هېواد کې یې تراوسه پورې ټولو ولایتونو ته خدمات پر وخت رسولي دي او په دې برخه کې لا هڅې ګړندۍ دي.
