په اوږد مهال کې د کونړ پر سیند د برښنا او اوبو بند جوړولو پروژه افغان دولت په پلان کې لري او د دغې پروژې سروې د سردار محمد داوود خان د واک پرمهال ترسره شوې هم وه .
له کلونو راهیسې د کونړ سیند اوبه ګاونډي هېواد پاکستان ته روانې دي او هلته ترې د برښنا او ځمکو خړوب لپاره ګټه اخېستل کیږي.
له هغې وروسته چې پاکستان پر زور د افغان کډوالو د اېستلو لړۍ پیل کړې افغانان د کونړ پر سیند د اوبو بند جوړېدو غوښتنه کوي.
د کندز ولایت یو تن اوسېدونکی محمد اشرف وايي:« که په هر قیمت کېږي، باید د کونړ سیند اوبه مهار شي. دا د مشرقي او ټول هېواد خلکو اوبه دي. زه د یوه مشر په توګه، د یوه سپين ګیري په توګه پیسې هم ورکوم، کاریګر هم ورته نیسم او خپله هم کار کوم. په هر قیمت چې کېږي باید دا اوبه مهار شي. له اسلامي امارته مو هېله دا ده چې دا اوبه مهار کړي.»
»
د کندز ولایت یو بل اوسېدونکی حاجي میر اقا بیا وايي:« موږ افغانان ټول د کونړ سیند اوبو مهار کېدل غواړو. مالي او ځاني مرستو ته چمتو یو. خپله څومره دارايي چې لرو دا ترې قربان کوو.»
د پلازمینې کابل اوسېدونکي هم همدا غوښتنه کوي چې افغان دولت باید د کونړ پر سیند د اوبو بند جوړېدو چارې پیل کړي او دوی ورسره همکار دي.
د کابل یو تن اوسېدونکی وايي:« د کونړ سیند چې د افغانستان پر اقتصادي، کرنې او کاري سکټور کې ځانګړی اقتصادي او ملي ارزښت لرونکی دی، افغانستان ملت نه یوازې د دغه سیند د اوبو له مهار کولو بشپړ ملاتړ کوي بلکې دا اراده لري چې د دغه سیند د اوبو مهار کولو ټول لګښت ملت ورکړي. نو موږ له حکومته غوښتنه کوو چې د دې سیند اوبه ژر تر ژره مهار کړي او دا دې په خپلو اقتصادي پالیسو کې شامل کړي.»
دبلخ ولایت اوسېدونکي هم وايي، ولسونه له حکومت سره همکار دي او باید د کونړ سیند د اوبو مهار لپاره جدي کار پیل شي.
د بلخ ولایت یو تن اوسېدونکی وايي:« د کونړ سیند اوبه کلونه په وړیا ډول پاکستان ته روانې دي. دا چې اوس هغوی پر خپله خاوره افغان کډوالو ته ځای نه ورکوي، د هغوی کورونه یې ترې پر زوره وګرځول، نو زموږ تمه په دغه برخه کې له اسلامي امارته دا ده چې ژر تر ژره دې د کونړ سیند اوبو مهار کولو لپاره هلې ځلې وکړي. که اسلامي امارت یوازې په رسمي توګه غږ پورته کړي چې موږ د کونړ پر سیند باندې یو بند جوړوو، ترڅو اوبه له پاکستانه راوګرځول شي د افغانستان ټول قومونه که پښتون دی، که تاجک دی، که هزاره دی، که ترکمن دی، که ازبک دی که له هره قومه وي، انشاء الله له اسلامي امارت سره به درېږي. »
د لویې پکتیا او خوست اوسېدونکي هم دې ته لېواله دي چې د افغانستان اوبه مهار شي او په ځانګړي توګه د کونړ پر سیند دې داسې بند جوړ شي چې له اوبو او برښنا یې نه یوازې خیتځ بلکې ټول هېواد ګټه واخلي.
د خوست ولایت یو تن اوسېدونکی وايي:« له حکومته مو هېله دا ده چې په دې برخه کې ګام پورته کړي ځکه دا د ټول افغانستان پر ګټه ده. د کونړ سیند اوبه باید مهار شي. په دې برخه کې زه او نور ځوانان دې ته چمتو یو چې له حکومت سره همکار پاتې شو او هغه څه مو چې په وس کې وي له دوی ( حکومت ) سره همکاري وکړو.»
په ورته مهال د هرات او کندهار اوسېدونکي په جدي توګه له حکومته غواړي د کونړ سیند د اوبو مهار لپاره دې ګړندي ګامونه واخلي او په مالي یې برخه کې ورسره همکار دي.
عبدالعزیز چې د حقوقو او سیاسي علومو محصل دی وايي، باید د کونړ سیند اوبو د مهار لپاره په دغه سیند د برښنا اوبو ستر بند جوړ شي او دی حاضر دی چې د خپلو زده کړو د یوه سیمیسټر فیس ورته ځانګړی کړي.
د کونړ پر سیند د اوبو او برښنا بند جوړښت ستره پروژه بلل کیږي چې سرته رسېدو سره به یې په زرګونه هکتاره شاړه ځمکه خړوب او ګڼو ولایتونو ته به برښنا ورکړي او له دې سره به د افغانستان اوبه چې له کلونو کلونو راهیسې ګاونډي پاکستان ته وړیا روانې دي مهار شي.
