۲۰۲۳ کال اکتوبر ۲۳مه هغه ورځ چې د افغانانو ترڅنګ به یې پاکستانیان هم تل په یاد ولري.
دا هغه ورځ ده چې د رحمن الله ګربز په خبره ۱۲کاله یې ورته انتظار کړی او پاکستان یې په نړیوالو یو ورځنیو لوبو کې له ۷ سیالیو وروسته مات کړ.
د افغانستان کرېکټ په تاریخ کې دا بری کم نه دی ځکه د نړیوالو سیاسي څېرو ترڅنګ کرېکټ لوبغاړو او څارونکو د مبارکۍ او حیرانتیا پيغامونه ورکړي.
د ریاست الوزرا سیاسي مرستیال، قطر کې د اسلامي امارت سیاسي دفتر مشر او لوړ پوړو افغان چارواکو دا بری ستایلی دی.
قطر کې د اسلامي امارت د سیاسي دفتر مشر سهیل شاهین وايي:« د کرېکټ د نړيوال جام په سیالیو کې د پاکستان په خلاف د افغانستان د ټیم بريا ټولو هېوادوالو او د کرېکټ د ملي ټیم هریوه تن ته وايم. ځوانانو دا بریا مو مبارک شه او د لا بریاوو په هېله.»
د ریاست الوزرا سیاسي مرستیال مولوي عبدالکبیر وايي:« دا بریا دې د کرېکټ ملي لوبډلې، کرېکټ بورد او ټولو افغانانو ته مبارک وي. دې لوبې وښوده چې افغان ځوانان په هر ډګر ګې وړتیاوې لري او بریاوې خپلولی شي او موږ ورته لابریا غواړو.»
د اسلامي امارت رهبرۍ غړی انس حقاني وايي:« زموږ کرېکټ تر بل هر وخت په ښه وضعیت کې دی؛ په لومړي ځل مو د انګلستان او پاکستان ټیمونه مات کړل، دا غټه کامیابي دې ټولو ته مبارک وي. افغانان مستعد خلک دي؛ چې متحد وي او د ټیم په توګه کار وکړي، هر څه ممکن کوي.»
کرېکټ افسانوي لوبغاړو سچن ټنډولکر، کریس ګیل، عرفان پټهان او ګوتم ګمبیر د افغان لوبغاړو بریا ستایلې او د ښې لوبې پایله یې یاده کړې.
سچن ټنډولکر ویلي:« نړیوال جام کې د افغان لوبډلې کارګردګي د پام وړ ده، توپ وهنه، ډګر ساتنه، او ویکټو ترمېنځ منډې دا ثابتوي چې افغان لوبډله به نوي څه کوي.»
کریس ګیل ویلي:« تاریخي بریا د افغانستان لپاره، څو ورځې وړاندې یې اتله لوبډله ماته کړه او دا بری به د لوبډلو نوملړ جالب کړي.»
پر دې بري افغانان او کرېکټ نور څارونکي خوشحاله دي خو پاکستاني څارونکي بیا پرخپلو لوبغاړو قهر دي او دا یې د هېواد شرمناکه ماته یاده کړې.
افغان سولې لپاره د امریکا پخواني ځانګړي استازي زلمي خلیلزاد او د پښتون ژغورنې غورځنګ مشر د تاریخي بریا مبارکي ویلي.
د افغان سولې لپاره د امریکا پخواني ځانګړي استازي زلمی خلیلزاد ویلي:« افغانستان ته دې د پاکستان پر وړاندې دا بریا مبارک وي.»
د کرېکټ په نړۍ کې که څه هم پاکستان او هند تاریخي مخالفې لوبډلې ګڼل کېږي خو اوس د پاکتسان او افغانستان کرېکټ سیالۍ له بلې هرې جالبه وي، افغان لوبدلې پاکستان ته په مسلسله توګه اوه لوبې بایللې وې خو دا بری ممکن پاکستان د ۲۰۲۳ کال نړیوال جام کې له مخکې تګ پاتې کړي.
