عمر: کندهار کې د درملو کيفيت مالومولو لابراتوار جوړيږي

د خوړو او درملو د ملي ادارې مشر ډاکټر عبدالباري عمر کندهار ته خپل سفر کې ځایي چارواکو ته ویلي، دغه ولایت کې  د درملو کیفیت مالومولو لابراتوار د ۵.۲ میلیونه امریکايي ډالرو په ارزښت جوړیږي.

هغه  ویلي ډېر ژر به د کندهار تر څنګ هرات، بلخ او ننګرهار ولایتونو کي هم د درملو کیفیت مالومولو لابراتوارونه جوړ شي.

اخوا د کندهار والي ملا محمد شیرین آخوند ویلي، دا پر ټولو سوداګرو اسلامي او ملي فریضه ده، چي هېواد ته کیفیت لرونکي خواړه او درمل راوارد کړي.

آخوند دغه راز  له مسوولینو غوښتنه وکړه، چي سوداګرو ته په ګمرکاتو کې اسانتیاوې برابرې کړي او هم یې د ولایتي ادارې په استازیتوب د هر ډول همکاریو ډاډ ورکړ.