واک ته د اسلامي امارت له څه باندې ۱۸ میاشتو وروسته لاهم د اسلامي امارت او نړیوالې ټولنې ترمنځ د خبرواترو او تفاهم غوټه نه ده پرانېستل شوې.
که څه هم اسلامي امارت په کراتو ویلي،چې دوی د رسمیت پېژندنې لپاره د نړیوالې ټولنې اېښودل شوي ټول شرطونه عملي کړي،خو بل پلو بیا نړیواله ټولنه اسلامي امارت د بشري حقونو په نقض او د دوحې له هوکړې په سرغړونې تورونوي.
تازه د افغانستان لپاره د ملګرو ملتونو ځانګړې استازې روزا اوتونبایوا د ریاست الوزرا له سیاسي مرستیال مولوي عبدالکبیر سره په لیدنه کې له افغانانو سره د ملګرو ملتونو د مرستو د غځولو د ډاډ ترڅنګ د نړیوالې ټولنې او اسلامي امارت ترمنځ د ستونزې د حل لپاره پر سیاسي تفاهم او خبرو اترو ټینګار کړی دی.
د ریاست الوزرا د دفتر عمومي ریاست:« په دې لیدنه کې د افغانستان لپاره د ملګرو ملتونو ځانګړې استازې روزا اوتونبایوا د خبرو او تفاهم له لارې د افغانستان د ستونزې حل غوښتنه کړې او په دې برخه کې یې د ملګرو ملتونو د هڅو ډاډ ورکړی دی.»
د بهرنیو چارو وزارت سیاسي مرستیال شیرمحمد ستانکزي تېره اوونۍ متحده عرب اماراتو کې یوې ته ناستې په وینا کې دا منلې،چې ګڼ شمېر هېوادونه غواړي اسلامي امارت په رسمیت وپېژني،خو امریکا په دغه لار خنډ واقع کیږي او په خبره یې ټول د امریکا دریځ ته په تمه دي.
د سیاسي چارو شنونکي بیا له اسلامي امارت غواړيؤچې له نړیوالې ټولنې سره سیاسي تفاهم ته د رسېدو لپاره هغه مشروع غوښتنې ومني،چې نړیوالې ټولنې اسلامي امارت سره د خبرو د پيل لپاره د شرط په توګه اېښي.
بل پلو ځینې نور په دې اند دي،چې نړیوالې ټولنې ته پکار ده،چې په نړیوالو ناستو او ټولو هغو غونډو کې چې اصلي موضوع یې د افغانستان په محور راڅرخي، باید اسلامي امارت ته د مخامخ ګډون بلنه ورکړل شي،ترڅو له دې لارې د دواړو ترمنځ تفاهم لار هواره شي.
د سیاسي چارو شنونکی زلمی زرمتی وايي:« اساسي لاره دا ده،چې په نړیوالو ناستو کې دوی ( اسلامي امارت) ته بلنه ورکړل شي. دوی ( اسلامي امارت) د کېناستو حق ورکړل شي، ترڅو د یو بل غږ واوري،چې پایله کې به یې تعامل ته لاره پرانېستل شي او د رسمیت پېژندنې پروسه به رالنډه شي.»
د ملګرو ملتونو ځانګرې استازې داسې مهال د اسلامي امارت او نړیوالې ټولنې ترمنځ پر خبرو ټینګار کوي چې له دې وړاندې هم د ملګرو ملتونو د سرمنشي مرستیالې امنه محمد په ګډون بیلابیلو لوړپوړو چارواکو افغانستان ته په خپلو جلا جلا سفرونو کې اسلامي امارت ورته غوښتنې کړي خو هغه ډول چې برېښي تر دې دمه په دې برخه کې محسوس پرمختګ نه دی رامنځته شوی.
