د اسلامي امارت د کانونو او پترولیم وزارت مسوولین وايي، راتلوونکې میاشت کې به اته کانونه پر قرارداد ورکړي.
د یاد وزارت ویاند عصمت برهان وايي،دغه اته کانونه چې په هرات او غور کې دي، له ډلې يې د غوري اوسپنې لوی کان هم په کې شامل دی.
د برهان په خبره، د غوري اوسپنې کان لپاره یې له داخلي او بهرنیو شرکتونو پروپوزلونه راټول کړي او ژر به یې ګټونکي شرکت ته پر قرارداد ورکړي.
برهان زیاته کړه:« د افغانستان پر سطحه باندې اته سترې پروژې، دغه راز د نړۍ پر سطحه،چې یو ستر کان لرو، هغه د غوریان اوسپنې کان دی، چې له ایران سره پر پوله پروت دی. دا کان ۲۰ سلنه ایران او خوشبختانه ۸۰ سلنه په افغانستان کی دی، نو همدغه کان مو اوس اعلاناتو ته سپارلی دی. اعلان مو مخکې ورکړی، شااوخوا ۲۵۰ پروپوزلونه راټول شوي. دغه ۲۵۰ پروپوزلونه د کورنیو او بهرنیو شرکتونو دي.»
په ورته وخت کې برهان وايي، اوس مهال يې د هېواد پر کچه نږدې۱۸۰ لویې او وړې پروژې تر کار لاندې دي،چې په کې يو میلیون کسان پر کار بوخت دي.
هغه زیاته کړه:« اوس مو چې کومې نوې پروژې د سږ کال لپاره شرکتونو ته سپارلي دي، ۱۵۸ د تېر کال وې اوشااوخوا ۲۰ پروژې، چې دا اوس نوی کال د اسلامي امارت د راتګ شروع شوی دی. شااخوا ۱۷۰ پروژو پر کار پیل کړی دی. په هره پروژره کې په زرګونه کسان پر کار بوخت دي.»
د قشقرې د تېلو کان، د لوګر مس عینک کان، د ډبرو سکرو بېلا بېل کانونه او د لسګونو نورو منرالونو کېندنې هغه څه دي،چې دغه وزارت یې خبر ورکوي.
برهان وايي:« خپل کلنی راپور مو وړاندې کړ. هغه کلنی هدف چې راته ټاکل شوی وه، له هغه وړاندې تللي وو، نو ۱۴ میلیارده افغانۍ مو عواید درلودل، البته دا له عادي منرالونو ول. ۱۴ میلیونه ډالره عواید مو له نفتو،تېلو او ګازو درلودل. نو دا د هېوادوالو لپاره ډېر څه دي. »
د کانونو او پترولیم وزارت د ټول هېواد پر کچه د کانونو د کېندنې برخه کې د شفافیت ډاډ ورکوي او په خبره یې هېچ چاته دې برخه کې د خپل سرۍ او زورواکۍ اجازه نه ورکوي.
