د امريکا متحده ايالاتو هغه پريکړه،چې پر بنسټ یې د افغانستان له کنګل شوې شتنمي ۳.۵ مليارده ډالر د سويس بانک ته استول کيږي،له سختو غبرګونونو سره مخ ده.
د افغان سولې لپاره د امريکا متحده ایالتو ځانګړي استازي توماس ویسټ په تازه څرګندونو کې ويلي، د دې پريکړې پربنسټ متحده ايالات غواړي، یادې شتمنۍ ته د اسلامي امارت او د افغانستان بانک لاس رسی محدود کړي.
ويسټ زیاته کړې:« دا پیسې د افغانستان له خلکو سره د مرستې لپاره دي او د افغانستان بانک او طالبان به ورته لاسرسی ونه لري. له یو شمیر افغانانو سره به د خلکو د وضعیت د ښه والي په اړه د څېړنو په هدف تماس ونیول شي.»
دهېواد پخواني ولسمشر حامد کرزي پر خپله ټوټير پاڼه د امريکا متحده ايالاتو ياده پريکړه غندلې او غوښتنه يې کړې،چې د افغانانو ټوله ګنګل شوې شتمني دې په خوندې توګه وساتل شي.
کرزي زیاته کړې:« د امريکا متحده ایالاتو هغه پريکړه،چې د افغانستان بانګ ګنګل شوې شتمني يې په دوو برخو ويشلې،مخکې مې هم رد کړې وه او اوس يې هم نه منم او ردوم يې. غواړم،چې ياده شتمني په بشپړه د افغانستان د خلکو د مالي خزانې په توګه محفوظه وساتل شي.»
د اسلامي امارت بهرنيو چارو وزارت له لوري په خپره شوې خبر پاڼه کې ويل شوي،چې د امريکا متحد ایالتو دغه پريکړه د افغان ولس د غوښتنو په خلاف عمل دی او د دغو زيرمو لګول يې د افغانستان د اقتصادي ثبات پر وړاندې د امريکامتحده ایالتو منفي اقدام او د ټولو نړيوالو اصولو خلاف عمل بللی دی.
د خبرپاڼې یوه برخه:« د امریکا د متحده ایالتونو وروستۍ پرېکړه،چې له مخې يې د افغانستان بانک د پولي زېرمو (۳.۵میلیارده ډالر) سویس ته لېږدول کېږي،د نړیوالو اصولو خلاف او د نه منلو اقدام دی.
اسلامي امارت د خپلو خلکو لپاره د یوه مسوول حکومت په توګه د دې اقدام له میکانیزم سره خپل واضح مخالفت څرګندوي.
د افغان ولس د خوښې پرخلاف، په نورو چارو کې د دغو زېرمو لګول،د افغانستان د اقتصادي ثبات پرخلاف د امریکا منفي اقدام ګڼل کېږي.
که د افغان ولس د مشروع غوښتنو پرخلاف له اسعاري زېرمو ګټه اخيستل کېږي، اسلامي امارت مکلف دی،چې د هر هغه فرد، موسسې او شرکت چې په دې غیرقانوني چاره کې مرسته کوي او د افغانستان مرکزي بانک له اسعاري زېرمو د بشري مرستو په پلمه او نورو مواردو کې ناسمه استفاده کوي،په افغانستان کې جرمانه کړي او فعالیتونه به یې وربند کړي.»
د اقتصادي چارو شنونکي د ګنګل شوې شتمنې په اړه د امريکا د متحده ايالاتو وروستۍ پريکړه د هيواد د مالي او بانکي سيتم پر زيان بولي.
د امريکا متحده ایالتو حکومت تیره چهارشنبه پریکړه وکړه،چې د افغانستان د کنګل شوې شتمنۍ یوه برخه چې ۳.۵ مليارده ډالر کيږي، د افغان فنډ په نوم یو صندوق ته استوي،چې د افغانستان اقتصادي پرمختګ لپاره به ولګول شي.
