د بلخ په مرکز مزارشريف ښار کې د زون پر کچه د چهارشنبې پر ورځ د « ۱۴۰۱ کال وږي پر ۲۳ مه» د افغانستان بانک نوې ودانۍ جوړه او رسما ګټې اخېستنې ته وسپارل شوه.
د بانک دغې ودانۍ پرانېستې په اړه جوړو شویو مراسمو ته له مرکز کابله هم یو شمیر چاروکي ورغلي ول.
د افغانستان بانک مشر حاجي عبدالقاهر ادریس وايي:« هغوی یو کمېسیون ورته ټاکلی دی، چې په افغانستان کې کومه مروجه بانک داري په دې تېرو ۲۰ کلونو کې وه، دا ټوله بانک داري پر اسلامي بانک داري باندې واړوي. خو دا به یو څه وخت ونېسي، پرې دې باندې کار شروع شوی دی، کمېسیون ورته ټاکل شوی دی. هغه کمېسیون پرې دې باندې کار کوي، مخکیني مقررات ګوري،هڅه کوي،چې د اسلامي شریعت په رڼا کې بانک داري ټوله اسلامي کړي.»
د بلخ والي قدرت الله ابو حمزه د زون پر کچه د افغانستان بانک د څانګې ودانۍ پرانېسته باندې خوښي وښوده او د بانکي سییستم د عادي کیدو غوښتنه یې وکړه.
حمزه زیاته کړه:« کوم کارونه،چې په بانک کې کېږي، چې هغه د پیسو جمع کېدل دي، د پیسو لېږد دی، یا نور هغه اسناد دي، حوالې دي، تجارتي توکي دي، نو په دې ټولو کې باید هڅه وشي،چې دا د اسلامي دین مطابق واوسي.»
اخوا یو شمېر د مرازشریف یو شمېر اوسېدونکي له بانکي خدماتو شکایت کوي وایې، په ورځو ورځو بانک کې نوبت ورته نه رسېږي.
دوی وايي، زاړه بانک نوټونه هم لویه ستونزه ده او له مسوولینو غواړي،چې دغو ستونزو ته دې جدي پاملرنه وکړي.
د مزارشریف یو تن اوسېدونکی محمد نعیم وايي:«په اوسنیو شرایطو کې هغه زاړه بانک نوټونه، دلته ډېر شوي دي، چې ان د کارونې وړ نه دي. نو له ا مسلامي امارته مو غوښتنه دا ده،چې په دغه برخه کې هم دوی کار وکړي. زاړه بانک نوټونه دي، ټول کړي او پر ځای دې نوي بانک نوټونه بازار ته وړاندې کړي.»
دا په داسې حال کې ده،چې بار بار حکومتي چارواکو په هېواد کې د بانکي سسټمونو ستونزه په حل کېدو خبري او ژمنې کړي،خو د یوه کال په تېرېدو سره دې برخه کې د پام وړ کوم پرمختګ نه دی شوی.
