د روغتیا نړیوال سازمان مشر ډاکټر ټېډروس ادانوم جنیوا کې د یوه خبري کنفرانس پر مهال وویل، د کورونا وبا ډېلټا بڼه په چټکۍ سره خپرېږي او ښايي ډېر ژر په ټوله نړۍ کې خپره شي.
ادانوم وايي،ښايي د کورونا له دې نوې بڼې سره پېښې او مړېنې هم زیاتې شي.
دغه راز ادانوم وايي، نړۍ ګوري،چې د کورونا وبا خپلې بڼې بدلوي او د خپرېدو وړتیا یې لا زیاتېږي.
ډیلټا بڼه چې لومړی په هند کې پېژندل شوې، تر اوسه پورې د نړۍ ۱۰۴ هېوادونو کې یې مثبتې پېښې ثبت شوي دي.
په ورته وخت کې ادانوم وايي، تېره اوونۍ څلورمه مسلسله اوونۍ وه،چې د نړۍ پر کچه د کورونا وبا مثبتې پېښې په کې زیاتې شوې دي.
هغه همدارنګه زیاتوي،چې د لسو اوونیو کمېدنې راهېسې د کورونا وبا له امله د مړینې کچه هم بیا لوړه شوې ده.
کورونا وبا د لومړي ځل لپاره د ۲۰۱۹ زېږدیز کال په ډسمبر میاشت کې د چین مرکزي هوبي ولایت په ووهان ښار کې پیدا شوه.
د امریکا متحده ایالتو د جان هاپکنز پوهنتون د شمېرو له مخې، ټوله نړۍ کې پر کورونا وبا د اخته کسانو شمېر له ۱۸۷.۲ میلیونو لوړ شوی او په څه باندې ۴ میلیونه کسان ترې مړه شوي دي.