د جرمين دفاع وزيره انګریټ کرمپ وايي، له افغانستانه مو د سرتېرو اېستلو بهیر بشپړ شوی دی.
کرمپ وايي،افغانستان کې یې تاريخي او قوي ماموريت پايته رسېدلی او ځواکونو يې دې جګړه کې ځان ثابت کړی دی.
کرمپ زیاته کړه:« دا د يوه تاريخي فصل او ماموريت د پايته رسولو ښکارندوی کوي، چې د جرمني وسله وال پوځ لپاره ننګونکی دی، په هغې کې جرمني وسله وال پوځ جګړه کې ځان ثابت کړ. دا هغه جګړه وه، ې زموږ سرتېرو ته په کې مرګ ژوبله واوښته او موږ پرې اوښکې توې کړې.»
د افغانستان بهرنيو چارو وزير هم شمشاد سره په يوه ځانګړې مرکه کې ويلي، د بهرنیو ځواکونو یو شمېر يې وتلي او پاتې نور به يې په راتلونکو څو اونیو کې خپلو هېوادونو ته ستانه شي.
له افغانستانه د جرمني سر تېرو په وتلو سره د امريکا دفاع وزارت ویلي، افغانستان کې له روان وضعیت بېخبره نه دي، د وضعیت څارنه کوي او تاوتريخوالی یې زيات بللی دی.
د امريکا دفاع وزارت وياند جان کربي وايي:« هغه څه چې موږ یې غواړو، ووينو او موږ یې خوښوو، چې وې وينو هغه سولې پروسې ته د طالبانو راګرځېدل دي. تاوتريخوالی ډېر زيات لوړ دی او موږ ټول افغانستان کې له امنيتي وضعيت خبر يوو.»
له ۲۰۰۱ زېږدیز کال راهيسې افغانستان کې شااوخوا ۱۵۰ زرو جرمني سر تېرو په مرحله واره توګه دنده ترسره کړې، چې په دې موده کې يې ۵۹ تنه وژل شوي دي.
د مالوماتو له مخې،جرمني له تېرې مې مياشتې پورې د ناټو په چوکاټ کې ۱۱۰۰ سرتېري لرل، چې وروستي هغه يې ورمه ورځ خپل هېواد ته ستانه شول.