د بلخ والي محمد فرهاد عظيمي په مزارشريف ښار کې يوه خبري کنفرانس ته وويل چې په تېرو دوه ورځو کې يې کلدار ولسوالۍ د طالبانو له شتون پاکه کړې ده.
هغه زياته کړه، د مزارشريف ښار او حيرتان بندر دفاعي خطوط يې په قوي ډول مجهز کړي او د طالبانو د هر ډول بريدونو د دفع کولو لپاره يې تیاری نيولی دی.
د بلخ والي که څه هم کره ارقام نه په ډاګه کوي، خو وايي چې د دغه ولايت په وروستيو جګړو او عملياتو کې وسله والو طالبانو او دولتي ځواکونه مرګ ژوبله اوښتې ده.
د هغه په وينا، د سقوط شويو ولسواليو د بيا نيولو لپاره عملياتي پلانونه چمتو شوي، چې ډېر ژر به يې عملي کړي.
فرهاد عظيمي وويل چې له مزارشريف ښار څخه د دفاع او همدا راز د عملياتو په برخه کې له امنيتي ځواکونو سره د ولسي پاڅونکونکو همکاري اغېزمنه تمامه شوې ده.
د هغه په وينا، د دولتي ځواکونو د تلفاتو مخنيوي په موخه وړمه ورځ له شورتېپې ولسوالۍ څخه دوی شاتګ کړی او د يادې ولسوالۍ په يوه بله خوندي او حاکمه سيمه کې د شورتېپې ولسوالۍ اداري چارې د فعالېدو په حال کې دي.
نوموړي ډاډ ورکړ، چې د حيرتان بندر امنيت په بشپړ ډول خوندي دی او له سوداګرو يې وغوښتل چې هېڅ ډول وېره دې نه کوي.