روسیې، ازبکستان او ایران د افغانستان شخړې سوله ییز حل کې د مرستو اوهمکاریو ټټر وهلی او ټولو پر دې ټینګار کړی،چې دغه شخړه پرته له سیاسي لارې پوځي لارې نه شي حل کېدای.
ایران طالبان د افغانستان يوه برخه بللې، خو ویلي یې دي چې نه اوس او نه په راتلونکې کې د حکومت ټوله برخه جوړېدای شي.
د ايران بهرنيو چارو وزارت ویلي، دا اړينه ده، چې د افغانستان ځمکنۍ بشپړتيا او د تېرو لسيزو لاسته راوړنې خوندي شي او د تلپاتې سولې او ثبات لپاره دې موثقې بين الافغاني خبرې پيل شي.
د ایران بهرنیو چارو وزارت ویاند سيد خطيب زاده وايي:« طالبان د افغانستان يوه برخه ده،خو اوس او راتلونکي م کې به د افغانستان حکومت ټوله برخه نه وي. دا اړېنه ده،چې د دغه هېواد ځمکنۍ بشپړتيا او د تېرو دوه لسيزو لاسته راوړنې خوندي شي، موثقې بين الافغاني خبرې تلپاتې حل په موخه يوازنۍ لار ده.موږ تیار يو،چې مذاکراتو کې مرسته وکړو.»
کابل کې د روسيې سفير هم په يوه تازه مرکه کې ويلي، د طالبانو له لوري دوی ته کوم مستقيم ګواښ نه شته او د افغانستان ستونزې حل په موخه د امريکا، چين او پاکستان استازو سره پر ګډه کار کوي.
کابل کې د روسيې سفير ډېمترې ژيرنوف وايي: « د روس، امريکا، چين او پاکستان استازي د وضعيت سمولو په موخه تريکا ميکانيزم له لارې کار کوي، موږ يوه پاليسي تعقيبوو، چې د جګړې ښکېل اړخونه وهڅوو، چې خبرو ته لومړيتوب ورکړي او جګړې ته د پای ټکی کېږي.»
په ورته مهال د ازبکستان د بهرنيو چارو وزير ويلي، د افغانستان د ستونزې په اړه د سيمې هېوادونو پر کچه بېلابېل نظرونه شتون لري او هېواد يې نشي کولی هغه نظام ومني، چې افغانستان په نويمه لسيزه کې درلود.
د ازبکستان بهرنيو چارو وزير عزير کاملوف وايي: « البته موږ نه شو کولی،هغه نظام، چې افغانستان په نوي يمه لسيزه کې درلوده ومنو او ستونزې بايد د دواړو لورو د افغانستان اوسني حکومت او نظام مخالفينو ترمنځ حل شي.»
کاملوف هم ټينګار کړی، چې د افغانستان ستونزه له پوځي لارې نه شي حل کېدلی او بايد د حل په موخه يې درېدلي مذاکرات بېرته پیل شي.
ايران، روسيه او ازبکستان دا څرګندونې داسې مهال کوي، چې افغان سولې لپاره د حکومت پلاوی لاهم د قطر پلازمېنه دوحه کې دی او له تېرو لسو میاشتو راهیسې د سولې خبرې نه دي پيل شوي.
