د طالبانو له لوري د تاوتریخوالي زیاتېدو او د جګړې شدت افغان حکومت د سولې له بهیره ناراضه کړی، او څو میاشتې کېږي، د سولې مرکچي ډلې اصلي خبرو ته نه دي کېناستلي.
افغان حکومت بار بار له طالبانو د خبرو غوښتنه کړې، خو میاشتې اوښتي چې دا بهیر پر ټپه ولاړ دی.
د ولسمشر مرستیال ویاند لطیف محمود وايي: «د افغانستان حکومت د سولې په اړه ریښتنې هڅې او اقدامات کړي. زموږ توقع له پاکستان دا ده، چې د سولې په اړه خپله اراده په عمل کې ثابته کړي.»
بل پلو د سیاسي چارو یو شمېر شنونکي د اوس لپاره د دوحې بهیر ناکام او له خنډ سره مخ شوی بولي.
دوی وایي، په دې پروسه کې بهرنۍ لاسوهنې زیاتې شوي او افغانان نه پریږدي،چې د سولې په اړه یوې پایلې ته ورسیږي.
د سياسي چارو شنونکی صلاح الدین سعیدي وايي:« دلته یو سلسله بهرني لاملونه دي،چې د افغانستان خلک سولې ته نه پرېږدي. شواهد ښکاره کوي،چې پاکستان او طالبانو په اصطلاح هوډ کړی دی،چې په عمل کې ښکاره کوي،چې دوی وایي موږ سیاسي قدرت په جنګ نیسو. دا چې لاملونه یې څه دي ،چېرته پیل شوي دي، مطميناً د طالبانو او امریکا ترمنځ د دوحې مزاکرات هم په ښه شکل مخکې نه وو تللي او اوس هم د سیاسي مناظرې مذاکرې توپير نه دی شوی.»
د پوهنتون استاد فیض محمد ځلاند وايي:« په دوحه کې د سولې خبرې له خنډ او ځنډ سره مخ شوي دي. طالبان او افغان حکومت هڅه کوي،د جګړې په ډګر کې امتیازات ترلاسه کړي،چې په دې وروستیو کې جنګ او تاوتریخوالی اوج ته رسېدلی.د قطر بهیر نیمګړی او ناکام ښکاري، خو نړیوال کوښښ کوي،چې یوه لویه ناسته جوړه کړي.»
خو طالبان بیا وایي، د بین الافغاني خبرو له پیل وروسته باید په درې میاشتو کې یې بندیان آزاد شوي وای او د مشرانو نومونه یې له تور لست وتلي وای،چې داکار نه دی شوی.
طالبان وایي، لومړی باید دا اوسنی پړاو پای ته ورسیږي او وروسته بل پړاو پیل شي.