د طالبانو له لوري د یو شمېر ولسوالیو له نیولو وروسته د افغان حکومت مخ ولسي پاڅونوالو ته اوښتی، هغه غیر مسوول وسله وال،چې په تېر کې د امنیتي ځواکونو تر جدي څار لاندې وو.
خو اوس همدغو ملېشو د افغان ځواکونو پر ملاتړ د طالبانو پرضد د جګړې اعلان کړی او جنګ ته چمتو شوي دي.
افغانستان کې د ملیشو جوړونې پایلې د حکومتونو د سقوط لامل شوي، خو اوس بیا تجربه کېږي. دا پوښتنه هم لاهم بې ځوابه ده، کله چې پوځ نه شي تجهیز کېدای، نو ملېشو ته امکانات څنګه او د چا لخوا برابریږي؟
د پوځي چارو شنونکی جنرال شعور ګل پښتون وايي:« د حکومت له لوري خو تر اوسه پورې وسلې نه دي وېشل شوي،هغه منطیقوي ټولي چې د قل اردګانو په چوکاټ کې جوړ شوي،له پخوا حکومت یو تشکیل درلود چې دوی ته تنخوا او اعاشه ورکوي.»
افغانستان کې د ملیشو جوړونې پایلې د حکومتونو د سقوط لامل شوي،خو اوس بیا تجربه کېږي.
بل پلو د ملي دفاع وزارت ولسي پاڅون کوونکي بیا ګټور بللي او وایي، دا د جګړې په ډګر کې د امنیتي ځواکونو پر مورال باندې ښه اغیز کوي.
د یاد وزارت ویاند روح الله احمدزی وايي:« ترهګرۍ سره د مبارزې لپاره د هېواد په ګوټ ګوټ کې د امنیتي ځواکونو په خوا کې د خلکو درېدل موږ ته مورال راکوي او دښمن ته سخته ضربه او د پاڅونوالو ټولې کړنې د امنیتي ځواکونو سره په همغږۍ ترسره کېږي.»
اخوا د ملي روغې جوړې عالي شورا مشر ډاکټر عبدالله عبدالله وایي، د طالبانو پرضد راپورته شوې ډلې ملیشې نه بلکې د حکومت ملاتړي دي.
په ورته وخت کې عبدالله پر یو شمېر سیاسیونو نېوکه وکړه،چې د امنیتي ځواکونو وړتېاوې نادیده نیسي.
عبدالله زیاته کړه:« په ځینو ځایو کې خلک په دوطلبانه، ان په یو شمېر سیمو کې تش لاس خلک د امنیتي او دفاعي ځواکونو په خوا کې درېدلي دي ښځې او سړي، خو اوس چې د امنیتي بنسټونو په رهبرۍ کې همغږي راغلې ده دا به ښه اغېز ولري.»
اوس که حکومت پر راپورته شویو پاڅونوالو ډاډه دی، خو د ولسي جرګې غړی صدیق احمد عثماني وايي، که دغه زرګونه پاڅونوال مدیریت او کنټرول نه شي، د راتلونکي لپاره به په یو بل سرخوږي واوړي.
عثماني زیاته کړه:« دحکومت له لوري په پاڅونوالو د وسلو وېش هغه هم د دولت له چوکاټه بهر یو غیر ضروري او نه توجې کېدونکی عمل دی.»
د طالبانو خلاف دا ډلې لومړی په شمالي ولایتونو کې راپورته شوې، لږ شمېر یې سوېل او سلګونه نور یې په شرق کې فعال دي او یا د را پورته کېدو لپاره ځانونه چمتو کوي.
