د جمهوریت روغتون د سرطان درملنې واټ کې د سرطان ناروغانو له پاره یوازې شپېته بستره موجود دي.
روغتیاپالان وايي، په بسترونو کې یې ناروغان په نوبتي ډول بستر کېږي،چې دې کار یې د درملنې اغېز کم کړی او همدا لامل دی،چې درملنه یې ښه پایله نه ورکوي.
روغتیا پال محمد هارون ارشد وایي:« له بده مرغه په روغتون کې د بسترونو کموالي له امله ناروغان په نوبتي ډول بستر کېږي، دې کار د درملنې اغېز کم کړی. همدا لامل دی، چې درملنه ښه پایله نه ورکوي.»
افغانستان کې د سرطان ناروغۍ د تشخیص او د ارقامو راټولولو له پاره کوم ځانګړی سیسټم نشته،چې کره تثبیت وکړي.
د سرطان پر ضد د مبارزې مرکز هر کال هغه ارقام خپروي،چې د روغتیا نړیوال سازمان یې اټکل کوي.
د روغتیا نړیوال سازمان مالومات ښيي، تېر کال ۲۴ زره افغانان پر سرطان ناروغۍ اخته شوي، چې له دې ډلې ۷۵ سلنه یې مړه شوي دي.
خو دا مرکز بیا د سرطان کره شمېر له دې دوه برابره لوړ یادوي.
سرطان سره د مبارزې پروګرام مرستیال سید اکرام هاشمي وايي: « کره شمېره نه شته، خو اټکل چې کېږي،دا شمېره ښايي له ۴۰ یا ۵۰ زرو هم لوړه وي.»
پلوشه تازه جمهوریت روغتون ته د سرطان درملنې له پاره راغلې.
وايي،درې کاله کیږي،چې د سینې له سرطانه خبره شوې،خو د کمزوري اقتصاد له امله نه ده توانېدلې،چې د خپلې ناروغۍ مسلسله او لازمه درملنه وکړي.
هېواد کې د سرطان ثبت شویو پېښو کې تر ټولو زیات د سینې سرطان ښوول شوی دی.
روغتیاپالان په لومړي پړاو کې د سرطان پر درملنې ټینګار کوي او وايي، ښه لار یې د جراحۍ له لارې د سرطان درملنه ده.
روغتیا پالان وايي، افغانستان کې د سرطان بشپړه درملنه نه کېږي، کیموتراپي او جراحي له لارې د درملنې امکانات موجود دي،خو د شعاع له لارې درملنې په موخه ډېری ناروغان له هېواده بهر ځي.
روغتیاپالان د سرطان ناروغي ګواښوونکې یادوي او له حکومته غوښتنه کوي،چې د امکاناتو او ظرفیتونو برابرولو په برخه کې دې ژر ګام پورته کړي.
د افغانستان پر کچه جمهوریت روغتون کې د سرطان درملنې دا یوازنی مرکز دی،چې زرګونه کسان ورته د درملنې له پاره راځي.
