د نواز شریف کورنۍ یو په بل پسې زندان ته روان دي.
اپوزیسیون ګوند مشر شهباز شریف په مالي فساد کې د لاس لرلو په تور لس ورځې زنداني شو.
د شهباز شریف پلویان چې د محکمې مخې ته راټول شوي وايي، له خپلو قانوني حقونو به دفاع ته ادامه ورکړي.
د لاهور د ملي حسابدارۍ محکمې په مالي فساد کې تورن شهباز شریف په لسو ورځو بند محکوم کړ.
د مسلم لیګ نواز ګوند ویانده مریم اورنګزیب وايي، محکمې د څېړنو له بشپړېدو وړاندې پرېکړه کړې او باید د دې کار ځواب ورکړي.
د مسلم لیګ نواز ګوند ویاندې مریم اورنګزېب ویلي، ((د حسابدارۍ ملي محکمې، د څېړنو په جریان کې پرېکړې کړې دي. محکمه باید د دې ځواب ووايي. اوسنی حکومت غواړي چې د حسابدارۍ محکمې له لارې خپل سیاسي غچ واخلي.))
پر شهباز شریف تورونه دي چې په ۲۰۱۴ کال کې یې په غیر قانوني توګه یو شمېر قراردادونه د ځان په ګټه لغوه کړي دي.
اوس د لاهور محکمې مخ ته د شهباز شریف زرګونه پلویان راټول شوي او د هغه د نیولو او محاکمې پر ضد شعارونه ورکوي.
د شریف د ګوند غړي وايي، د خپل قانوني حق لپاره به مبارزه وکړي.
د مسلم لیګ ګوند لوړپوړي غړي پروېز ملک ویلي، ((که خدای کول، موږ به د ولس احساساتو او غبرګونونو ته په کتو سره، له قانوني لارې د خپل حق غوښتنه وکړو.))
شهباز داسې مهال زندان ته ځي چې په پام کې ده د روانې اکټوبر میاشتې په ۱۴مه نیټه یو شمېر ایالتي او پارلماني څوکیو لپاره ټاکنې وشي.
شهباز وروسته له هغې په مالي فساد کې د تورونو له امله لس ورځې زنداني شو چې مشر ورور نواز شریف یې هم د ورته تورونو له امله تېره میاشت په لس کلن بند محکوم شو.
