یونیسف: د افغان ماشومانو او د هغوی کورنۍ ژغورنۍ لپاره ۲ میلیارډ ډالرو مرستې ته اړتیا ده

د ماشومانو لپاره د ملګرو ملتونو ملاتړې ادارې یا یونیسف ویلي،د زیاتې مرستې غوښتنه یې ځکه کړې ده،ترڅو افغانستان کې د ۲۴ میلیونه اړمنو کسانو چې نیمايي یې ماشومان دي بشري اړتیاوې پوره شي.

یونیسف ویلي، د دې مرستې په ورکولو سره به د افغان ماشومانو روغتیا، زده کړې، غذا او د دوی کورنۍ وژغورل شي.

یادې ادارې زیاته کړې،په افغانستان کې د بشري وضعیت مخ په خرابېدو سره دغه هېواد د روغتیا او تغذیې برخه کې د کړکېچ ترڅنګ د وچکالۍ، د شري ناروغۍ، د ماشومانو ګوزڼ او نورو ننګونو سره هم مخ دی.

یونیسف د دې ترڅنګ زیاته کړې،که د افغان ښوونکو تنخواوې ورنه کړل شي او د بېوزلۍ کچه دوام ولري،۱۰ میلیونه ماشومان به له ښوونځي د محرومېدو له ګواښ سره مخامخ شي.