د کندهار ښار سردار مدد څلور لارې ته نږدي د سړک پر غاړه هره ورځ زیات شمېر کسان د ورځنۍ مزدورۍ په خاطر راټولېږي، چې ډېرو ته يې په ټوله ورځ کې هم کار نه پیدا کېږي او تش لاسونه کورونو ته ستنېږي.
دغه کاریګر له سهاره تر ماښامه ناست وي، هر تېرېدونکي وسایط ته په دې خاطر ګوري چې ګوندې د مزدورۍ لپاره به يي بوزي.
دوی وايي، ورځ تر بلې بېکاري زیاتېږي او دلته نه یوازې د کندهار بلکې د نورو ولایتونو خلک هم د کار په تمه راځي.
دوی له سرپرست حکومته غواړي چې ورته د دایمي کار زمینه برابره کړي.
د کندهار ولایت یو تن اوسېدونکی ګلالی وايي: « له روژې او اختر راهیسې مو کار نه دی کړی، ټول مې پنځه ورځې کار نه دی کړی، اووه کسان په کور کې یو او حیران یم چې په څه یې ماړه کړم، هره ورځ په توره تیاره راوځم خو کار نشته. له حکومته مو هیله دا ده چې زموږ غم وخوري، دا خېمې وګورئ ټول دلته په کې پراته دي بیچاره ګان مجبوره دي.»
د وردګو ولایت یو تن اوسېدونکي سید محمد وايي: « دوې میاشتې کېږي چې کار لپاره راغلی یم، اختر کې هم کور ته لاړ نه شوم؛ خو کار هېڅ نشته او د کار کموالي له امله بیخي زیات ځورېږو، د کور خرڅ نه شو برابرولی. له حکومته غواړو چې موږ ته د دایمي کار زمینه برابره کړي او دا ټول کاریګر په کار بوخت شي.»
د کندهار یو بل اوسېدونکی نورالله بیا وايي: « له حکومته مو غوښتنه دا ده چې موږ ته دایمې کار پیدا کړي. په یوه کار کې مو شامل کړي. کار نشته په دې ښار کې، تاسې وینئ چې په چوکونو کې خلک بې کاره ګرځي او ګرده ورځ حیران پاتې وي چې څه وکړي.»
په کندهار ولایت کې د بې کارۍ د کچې لوړېدلو د ټولنې بې وزله طبقه سخته اغېزمنه کړې ده.
د دغه ولایت کار او ټولنيزو چارو رياست د کار امر مولوي محمد یوسف محمد وايي، دوی هڅه کوي، چې بې روزګاره کسانو ته د دايمي کار زمينه برابره کړي.
هغه زیاتوي: « د کار او ټولنیزو چارو ریاست ته د ولایت د حکم پر اساس ۱۵۰۰ عریضې راغلي دي او موږ د خپل ریاست د محترم رئیس د هدایت پر اساس تر دې دمه ۱۲۰ کسان تر کار لاندې لرو او دغه عریضې راته پرتې دي؛ نو موږ دا تصمیم لرو چې ټولو ته کار پیدا کړو او ان شاءالله ټولو ته به د کار زمینه برابرو.»
د کندهار د کار او ټولنیزو چارو مسولین خبر ورکوي چې په تېرو څو میاشتو کې یې لسګونه کسان له حرفوي زده کړو فارغ کړي او نږدې راتلونکي کې به د حرفوي زده کړو یوه بله دوره هم پیل شي.
