Skip to content
د کندهار ولایت د کرنې او مالدارۍ ریاست د ترویج مدیر محمد الله نوري وايي، په دې ولایت کې د شترمرغ يو لوی فارم جوړوي.
نوري وايي،په دوو کلونو کې يې د شترمرغانو د روزلو تجربه ترلاسه کړې او دغه کاروبار مخ په زياتېدو دي.
نوري زیاتوي:« نږدې شپږ زره شتر مرغان په کندهار کې خرڅ شوي دي،په تېرو درېیو کلونو کې د دې برخې ښه تجربه وه، هېڅ ستونزه په کې نه ده پیدا شوې. د دې شتر مرغ د روزنې کاروبار مخ پر وده دی. ورو وروه خلک د شتر مرغ ساتنې او روزنې ته لېواله کېږي.»
کندهار کې یو سوداګر شرف الدین په دې برخه کې پانګونه کړې او اوس یې کار څو برابر پراخ شوی دی.
شرف الدین وايي، هڅه کوي، سږ کال یو لوی فارم جوړ کړي او هغه مرغان او حيوانات ورته راوړي،چې هېواد کې نشته دی.
هغه وايي،دغه شترمرغان له ايران او ترکېې راوړي او په خبره یې دلته ښه بازار لري.
د شرف الدین په خبره، د کوچني شترمرغ بیه ۱۸ زره افغانۍ او د غټ بیه يې تر ۱۰۰ زرو افغانیو اوړي.
شراف الدين زیاتوي:« نږدې دوه کاله کېږي،چېموږ د شترمرغ د ساتنې، روزنې او سوداګرۍ کاروبار کوو.خلک د دې مرغانو ساتلو او روزلو ته لېواله دي،ځکه یو ځانګړی ښایست لري،. زموږ پلان دا دی،چې د شترمرغ د نسل ساتنې لپاره خاص فارم جوړ کړو.»
په کندهار کې د کرني ریاست د ترویج مدیر محمد الله نوري وايي، د شترمرغ د روزولو او تولیداتو ته د بازار موندلو لپاره پوره هڅه کوي او د يوه لوی فارم د جوړېدو پلان هم لري.
نوري زیاتوي:« موږ هڅه کوو،چې د دې برخې د ترویج لپاره کار وکړو، خلکو ته تر شلو دانو توضیح کړو، تر څو خلک له دې کاروبار سره اشنا شي او فارمونه ترې جوړ کړي.موږ راتلونکې کې کولای شو، نورو هېوادونو ته هم شترمرغ ولېږو.»
د افغانستان د کرنې او مالدارۍ وزارت بیا وايي، شترمرغ چې اصل یې له افریقا سره تړلی دی، کولای شي په یوه ساعت کې د ۷۰ کیلومتره پر سرعت سره واټن ووهي.
په دې سره دغه مرغه د نړۍ له ګړندي سفر کوونکو مرغانو په سر کې ځای لري. د کرنې وزارت وايي، معمولاً شترمرغ له ۶۳ څخه تر ۱۴۵ کیلو ګرامه پورې وزن لري.
