Skip to content
د اریانا افغان هوايي شرکت مسوولین وایي، کندهار درېیم ولایت دی،چې د طالبانو تر واکمنۍ وروسته یې له هوایي ډګرونو ملکي الوتنې پیل کېږي.
د یاد شرکت مشر رحمت الله ګلزاد وايي، دغه لومړی الوتنه یې کندهار ته له هراته د اریانا – افغان لومړۍ ملکي الوتنه وه،چې په کې یې له هرات څخه ۶۰ او له کندهار څخه ۱۰ مسافر کابل ته ولېږدول.
ګلزاد زیاته کړه:« زموږ الوتنې به هره ورځ د کابل له نړیوال هوايي ډګره نورو ولایتونو او له نورو ولایتونو به کابل ته کېږي.»
په ورته وخت کې ګلزاد وايي، ډېر ژر به د کابل له نړیوال هوايي ډګره د نړیوالو الوتنو لړۍ هم پیل شي.
ګلزاد وایي،د کابل له نړیوال هوایي ډګر د هغو برخو د بیا ترمیم چارې هم په چټکۍ سره پر مخ روانې دي،چې د امریکایي ځواکونو د وتلو پر مهال تخریب شوي وې.
هغه زیاتوي:« د کابل نړیوال هوايي ډګر اوس مهال یوازې د نړیوالو الوتنو لپاره چمتو نه دی. کله چې هوايي ډګر نړیوال ستنډرډ ته برابر شي، نړیوالې الوتنې به هم پيل کړو.»
اخوا د کندهار اوسېدونکې د ملکي الوتنو له بیا پیل کېدو خوښي ښيي او له مسوولینو غواړي، چې د ټکټونو بیې دې راټیټ شي.
د کندهار ښار یو تن اوسېدونکی وايي:« د افغانستان اسلامي امارت له ټولو چارواکو مو غوښتنه دا ده، چې په ټول هېواد کې هوايي ډګرونه ژر تر ژره ترمیم او د مسافرینو پر مخ دې الوتنې خلاصې کړي.»
بل پلو د احمدشاه بابا نړیوال هوايي ډګر مسوولین بیا وايي، دغه ډګر کې یې ټولې تخنیکي ستونزې حل کړي او دا مهال د هر ډول الوتنو لپاره بشپړ چمتوالی لري.
د هېواد په هوايي ډګرونو کې د ملکي الوتنو د درېدو له امله خلک له ګڼو ستونزو سره مخ وو او اوس غوښتنه کوي،چې د کورنیو الوتنو تر څنګ دې نورو هېوادونو ته هم د الوتنو لپاره زمینه برابره شي.
