Skip to content
د ا فغانستان اسلامي امارت د ویاند مرستیال بلال کریمي وايي، هېله من دي، چې د اسلامي همکاریو د سازمان راتلونکې ناسته کې به د افغان ولس اوسنی بشري وضیعت د بحث منځپانګه وي او په دغه برخه کې به له اسلامي امارت او افغانانو سره مرسته وکړي.
کریمي وايي:« اسلامي امارت داسلامي همکاریو د سازمان د ټولو غړو سره ډېرې ښې اړیکې لري او د دغې ناستې هرکلی کوو او ورته هېله من یو،چې د اسلامي امارت او د افغانانو ستونزوچې په دې مقطع کې یې لرواو بشري موضوعات یې عمده برخه جوړ وي، په برخه کې به ښې پریکړې ولري او د افغانانو ملاتړ ته به راودانګي او له خپله اړخه چې څه کولای شي،هغې ته به لار خلاصه کړي.»
خو د سیاسي چارو یو شمېر شنونکي بیا په دې اند دي،چې د اسلامي همکاریو د سازمان خبرې او پریکړې به چندانې اغیزمنې نه وي او په دغه ناسته کې به چې په اسلام اباد کې جوړیږي، له اسلامي امارته به د ښځو د حقونو به برخه کې غوښتنې مطرح شي.
د سیاسي چارو شنونکی طارق فرهادي وايي:« د اسلامي همکاریو سازمان غړو خبرې زیاتې دي او د خبرو اغیز یې کم دی. د دغه سازمان راتلونکي ناسته کې به اسلامي امارت ته یو پیام ورکړل شي،چې د ښځو د کار او تعلیم په برخه کې زیات وضاحت لازم دی،ځکه چې اسلامي نړۍ اوسنی وضیعت د تحمل وړ نه دی.»
خو د پوهنتون استاد فیض ځلاند وايي، لویدیځ او اسلامي نړۍ له اسلامي امارته تمه لري،چې په ډېرو مسایلو کې ورسره همغږي شي.
ځلاند زیاته کړه:« په دې ناسته کې به تر ډېره بریده د افغانستان د ناورین په تړاو اندیښنې رابرسیره شي او په لویه کې به له افغانستان سره د خپلو سیاسي دیپلوماتیکو او اقتصادي اړیکو د روغونې په برخه کې ځینې سپارښتنې وشي. په ټوله کې نړۍ له اسلامي امارته تمه لري،چې په ځینو مسایلو کې ورسره همغږي خپله کړي.»
ټاکل شوې ده، چې د روانې ډیسمبر میاشتې په نولسمه نیټه د اسلامي همکاریو د سازمان ناسته په اسلام اباد کې جوړه شي او په کې به د افغانستان په اوسني بشري، سیاسي او اقتصادي وضیعت بحث او خبرې شوي.
دغه ناسته د سعودي عربستان په نوښت جوړیږي،خو د پاکستان په غوښتنه یې کوربتوب همدې هېواد ته ورکړل شوو.
