له اوږد ځنډ وروسته، د خوست له نړيوال هوايي ډګره د کام ایر هوايي شرکت د یکشنبې پر ورځ د (۱۴۰۳ کال د غبرګولي پر ۱۳ مه) متحده عرب اماراتو ته مستقيمې الوتنې پيل کړې.
کام اير هوايي شرکت له خوست د متحده عرب اماراتو دوبۍ ښار ته په خپله لومړۍ الوتنه کې ۱۰۳ تنه مسافر انتقال کړل.
ټاکل شوې ده چې دغه شرکت به په اوونۍ کې دوې الوتنې له کابل – خوست او له خوست – دوبۍ ته ترسره کړي.
مسافر که څه هم د يادو الوتنو د پيل له امله خوښ دي، خو غوښتنه کوي چې دغه الوتنې بايد دوامداره وي او یوازې نمايشي بڼه ونه لري.
مسافر فرید الله وايي:« زه ډېر د خوشالۍ احساس کوم، ځکه چې له خوست زما لومړی پرواز دوبۍ ته دی. کله موږ چې له دې ځایه کابل ته تللو، نو درې یا څلور ساعته مزل وه، هغه اوس لنډ شوی دی.»
په ورته کې سوداګر د خوست او دوبۍ ترمنځ د اريانا او کام اير هوايي شرکتونو د الوتنو پيل له اقتصادي پلوه موثر ګڼي او په خبره يې، د مسافرو د لېږد ترڅنګ به د دې الوتنو په وسيله وکولی شي، د لويې پکتيا جلغوزی هم نړيوالو بازارونو ته په اسانۍ وړاندې کړي.
د سوداګرۍ او صنایعو خونې د مديره پلاوي غړی خان جان الکوزی وايي:« موږ به نه یوازې په دې کار وکړو چې له دې ځایه مسافر ولاړ شي او مسافر راشي، بلکې موږ به د کارګو په اړه، د اقتصاد او له دې ځایه د کارګو، ځېنې مېوو، په ځانګړي ډول د جلغوزیو انتقال په اړه موږ له هوايي شرکتونو سره خبرې کړي. موږ د کال له خوست څخه له ۱۵ تر ۲۰ زرو ټنو پورې جلغوزي بهر ته انتقال کوو. خوشبختانه چې د دې امکانات برابر شوي. اوس تاسو ګورئ چې هغه امکانات چې د خوست په هوايي میدان کې دي، په ډېرو نورو میدانونو کې نشته دي.»
له هغې وروسته، چې د خوست نړیوال هوایی ډګر د سرپرست حکومت لخوا په نړيوال ملکي هوايي ډګر بدل شوی دا په همدې کال کې دویم هوایي شرکت دی، چې له دې هوايي ډګر خپلې الوتنې متحده عرب اماراتو ته پیل کوي.
مسوولین وایي، هڅه یې دا ده ،څو دلته د مسافرو لپاره ټولې هغه اسانتياوې برابرې کړي، چې ورته اړتيا ده.
