له هغې وروسته چې جمهوریت نسکور او اسلامي امارت بیا ځلې واک ته ورسېد، نامني هم له منځه تللې، خو لاهم افغانستان سیاسي ثبات ته نه دی رسیدلی.
د سیاسي چارو کارپوهان وايي، د نړیوالو قوانینو او اصولو له مخې، نړیواله ټولنه په هغو هېوادونو کې د تل پاتې ثبات د ټینګښت مسوولیت لري چې تازه له جګړو راوتلي وي.
دوی وايي، په افغانستان کې د دایمي ثبات ټینګښت په برخه کې نړیوالې ټولنې خپل مسوولیت نه دی ادا کړی.
دوي یې لامل له امریکا او نورو هېوادونو سره د نړیوالې ټولنې د سیاستونو انحصار په ګوته کوي.
د سیاسي چارو شنونکی حکمت الله حکمت وايي: « نړیوالې ټولنې د افغانستان او نورو مظلومو او محکومو ملتونو پر وړاندې خپل رسالت نه دی ادا کړی، دا ځکه چې د نړیوالې ټولنې سیاستونه د زبرځواکونو په انحصار کې دي. د افغانستان پر وړاندې نړیوال سیاست د امریکا، اروپا او نورو زبرځواکونو له زاویې څخه تنظیم کېږي.»
کارپوهان په دې باور دي چې باثباته او خپلواک افغانستان نه یوازې د افغانانو بلکې د ټولنې نړۍ پر ګټه دی نو نړیوالې ټولنې ته په کار دي چې په دغه برخه کې رېښتینې هڅې وکړي.
د سیاسي چارو کارپوه شهزاده مسعود وايي: « په دې څلورو لسیزو کې نړیوالې ټولنې او په ځانګړې توګه د سیمې هېوادونو نه یوازې دا چې دایمي ثبات او دایمي امنیت لپاره عملي ګامونه نه دي پورته کړي بلکې د سیمې استخباراتو د افغانستان بې ثباتۍ ته لمن هم وهلی او تل یې بې ثباتي غوښتې ده. زما په نظر په اوسنیو شرایطو کې نه یوازې دا چې یو په خپلو پښو ولاړ دایمي امن او دایمي ثبات د افغانانو پر ګټه دی، بلکی د نړۍ پر ګټه هم دی او نړیواله ټولنه باید په دې برخه کې عملي ګامونه پورته کړي، ځکه چې په خپلو پښو ولاړ افغانستان د ټولې نړۍ پر ګټه دی.»
د ملګرو ملتونو منشور او د امنیت شور ۹۷ مې پریکړې پر اساس نړیواله ټولنه مکلفه ده چې د هېوادونو سولې او ثبات لپاره کار وکړي.
کارپوهان وايي، د ملګرو ملتونو د ۹۷ یمې پریکړې له مخې نړیواله ټولنه مسوولیت لري چې د افغانستان ثبات لپاره کار وکړي او په دغه برخه کې ښکیل هېوادونه له سره همغږي کړي.
د سیاسي چارو کارپوه زمان ګل دهاتي وايي: « د ملګرو ملتونو د منشور پر بنسټ سوله او امنیت د دوی اساسي دنده ده او دوی د افغانستان د ثبات په تړاو مکلفیت لري او دویمه هغه دنده چې دوی ته د امنیت شورا ۹۷ پرېکړې ور تر غاړې کړې ده، دوی مسوولیت لري چې په افغانستان کې د ثبات لپاره باید خپل مسوولیت ادا کړي.»
افغانستان په نړۍ کې د هغو هېوادونو له ډلې دی چې له پنځو لسیزو ناامنیو او جګړو تازه راوتلی ځواکمن مرکزي نظام لري، خو له سیاسي پلوه لاهم داسې ثبات ته نه دی رسیدلی چې افغانان یې هیله لري.
تمې دادي چې افغان حکومت او نړیواله ټولنه په خپلو کې د خبرو او تعامل له لارې د افغانستان ثبات لپاره کار وکړي او خلک په خپل راتلونکي باور مند کړي.
