تېره اونۍ د جرمني په سویل لوېدیځ کې د یوه افغان کډوال له لوري د سیاسي اسلام مخالفو پولیسو پر ډلګۍ د چاقو برید وکړ چې د پنځو پولیسو له ټپي کولو وروسته په کې یو پولیس افسر ومړ.
که څه هم د یادې پېښې په تړاو تراوسه د جرمني حکومت په رسمي ډول غبرګون نه دی ښودلی؛ خو د یاد هېواد یو شمېر چارواکو ټینګار کړی، چې د خپل هېواد د داخلي امنیت د ساتنې په موخه به ټول هغه کډوال له جرمني بهر کړي چې د یاد هېواد امنیت ګواښي.
د افغانستان بهرنیو چارو وزارت وايي، د یادې موضوع په تړاو د مالوماتو د راټولو په هڅه کې دي او له جرمني سره یې په دې تړاو خبرې نه دي شوي.
کارپوهان ټینګار کوي، چې د نړیوالو قوانینو له مخې د جرمني حکومت د فردي جرم پر اساس د ټولو کډوالو په تړاو پرېکړه نه شي کولی.
د نړیوالو اړیکو کارپوه عزیز معارج وايي: « لومړی دا چې په جرمني کې چې یوه افغان داسې ناوړه کار ترسره کړی دی، دا یې ښه نه دي کړي او د افغانانو د بدنامۍ لامل شوی، بله دا جرمني داسې اعلان نه دی کړی چې سلو په سلو یا په دقیق ډول کډوال یا غیر قانوني کډوال وباسي. دا د پالېسۍ له مخې همداسې اوازې خپرېږي څو د جرایمو مخه ونیول شي، ځکه جرمني د کورنیو قوانینو او په ځانګرې توګه د وینا هغه کنوانسیون پر بنسټ چې په ۱۹۵۱ او پرتوکول یې چې په ۱۹۶۰ ام کال ترسره شوی نه شي کولی د یوه فرد د جرم یا یوه عمل له مخې ټول کنوانسیون یا د هغه ضمایم تر پښو لاندې کړي او یا خپل کورني قوانین تر پښو لاندې کړي، دلته بیا نو دوی ناقصین د قوانینو تلقي کېږي.»
جرمني کې یو شمېر مېشت افغانان ادعا کوي چې ځېنې کړۍ شته چې هڅه کوي د جرمني او افغان کډوالو ترمنځ د بې باورۍ فضا رامنځته کړي.
د کډوالو یو شمېر مدافعین ټینګار کوي، چې د یادو پېښو په زیاتېدو سره په اروپايي هېوادونو کې د افغان کډوالو پر وړاندې د قوانینو د سختېدو امکان شته؛ که څه هم ورته اوازې د یاد هېواد د هغو پالېسيو برخه بولي چې پر بنسټ یې غواړي داخلي امنیت لا ټینګ کړي.
د کډوالو مدافع مصطفی آرین وايي: « جرمني تر اوسه په رسمي ډول د دغې موضوع په هکله کوم غبرګون نه دی ښودلی چې ګوندي انتقامانه غبرګون وښيي یا د دې موضوع انتقام واخلي، دا قانوني پروسه ده او له همدې لارې به یې یوه سرحد ته ورسوي. دا هم ځېنې کړۍ دي چې غواړي د جرمني او کډوالو ترمنځ د واټن لامل شي او دلته د بې نظمۍ د رامنځته کولو لپاره تبلیغات وکړي چې ګوندي جرمني غواړي کډوال درېیمګړي هېواد ته واستوي او د دې موضوع انتقام واخلي، تر دې دمه په رسمي ډول داسې څه نه دي شوي او ځېنې پروپاګندونه هم موجود دي چې د کډوالو اذهان تضعیف کړي.»
تورن افغان کډوال ۲۵ کاله عمر لري او په ۱۴۰۱ کال کې جرمني ته د پناه غوښتنې په موخه تللی. د راپورنو له مخې دغلته د نوموړي سیاسي پناه غوښتنه هم رد شوې ده.
یاد افغان کډوال د سیاسي اسلام مخالفې ډلګۍ اړوند پر یو شمېر پولیسو د چاقو برید وکړ چې څلور پولیس افسران یې ټپیان کړل او له ډلې یې یو ۲۹ کلن پولیس افسر تېره یکشنبه د ټپونو له امله ومړ.
