Skip to content
کابل ښاروالۍ د چهار شنبې پر ورځ د «۱۴۰۱ کال د غويي پر ۲۸ مه» د يوه رسنيز کنفرانس له لارې د روان ۱۴۰۱ کال د پراختیايي پروژو په اړه مالومات ورکړل.
د کابل ښاروال عبدالرشید بلوچ وايي، روان ۱۴۰۱ کال کې د ښار بېلا بېلو سيمو کې ۱۸۱ لویې او وړې پروژې پلان شوي او چار به یې ژر پیل شي.
بلوچ زیاته کړه:« د ۱۴۰۱ کال لپاره ۱۸۱ پروژې اوسني او تېر کال په موخه پلان کړي دي. په يادو پروژو کې د سړکونو بيارغونه، ترافيکي چارې، ترانسپورټي چارې،ترافيکي زېربېناوې رامنځته کول او د څلور لارو بيارغونه شامل دي.»
د کابل ښاروالۍ د پلان او پالیسۍ مشر محمد اصف جلالزی وايي، په دغو پروژو کې د تعلیم، صحت او ترافيکي خدمتونو پروژې شاملې دي او په تطبیق سره به یې ښار کې اسانتیاوې رامنځته شي.
جلالزي زیاته کړه:« د دې پروژو تطبيق کې پلان لرو،چې د ترافيکي او ترانسپورتي چارو د ښه تنظیم او ښه مديریت لپاره خاصه بوديجه او سروې په پلان کې لرو. همدا رنګه د چاپیریال ساتنې په برخه کې هم خاصې پروژې او خاصه بوديجه لرو.»
د ښاروالۍ ویاند نعمت الله بارکزی وايي، په روان کال کې به دغه ۱۸۱ پروژې له خپلې بودیجې پوره کړي.
هغه زیاته کړه:« په ۱۴۰۱ کابل کې د کابل ښاروالۍ د عوایدو هدف اته ميليارده افغانۍ ده. موږ به دا له خلکو راټولو،یانې دا زموږ عواید دي. په دې عوایدو کې تقريباً ۶۱ سلنه پروژې په پراختیايي پروژو مصرف کوو،چې هغه څلور ميليارده اته سوه دولس میلیونه افغانۍ کیږی. دا موږ بیرته پر ښار باندې مصرف کوو، دغه ۱۸۱ پروژو له دغه پروژو څخه تمويل کېږي.»
کابل ښاروالي زياتوي له داخلي بوديجي کولای شي يوازي د کال په اوږدو کې خدماتي پروژې پلې کړي او د اوږدمهاله پروژو تطبيق له پاره اړينه ده تر څو نړیوال ډونران د تېر په څېر پانګونه وکړي.
