د افغانستان لپاره د روسيې ځانګړي استازي ضمیر کابلوف ویلي، راتلونکې شنبه به تهران کې د مکسو فارمټ ناسته جوړه شي.
د کابلو په خبره، دغه ناسته کې به د مشورو تمرکز د ملګرو ملتونو په نوښت د افغانستان په تړاو په دوحه کې ترسره کېدونکې درېیمې ناستې ته پر چمتوالي وي.
کابلوف زیاتوي:« موږ د افغانستان له واکمنانو سره د ملګرو ملتونو د سرمنشي له لوري د دوحې درېیمې ناستې په تړاو بحث کړی. دغه ناسته به د جون له ۳۰ د جولای تر لومړۍ نېټې پورې وي، خو لومړیتوب دا دی چې د مسکو فارمت غړي به راتلونکي شنبه په تهران کې ګډه ناسته ولري، چې د روسیې په ګډون ایران، چین او پاکستاني ډیپلوماټان به په کې ګډون وکړي. د مشورو تمرکز به د دوحې ناستې ته پر چمتوالی وي.»
که څه هم د مسکو فارمټ مشورتي ناستې په اړه د سرپرست حکومت د ګډون په تړاو څه نه دي ویل شوي، خو ياد حکومت لاهم د ملګرو ملتونو پر بلنې سربېره، د دوحې په راتلونکې ناسته کې د ګډون او نه ګډون پرېکړه نه ده کړې.
خو سرپرست حکومت له دې وړاندې ویلي، د دوحې د ناستې اجنډا ورسره شریکه شوې او د څېړولو په تړاو يې خبرې روانې دي.
د مسکو فارمټ مشورتي ناسته د روانې جون پر ۸ مه داسې مهال جوړېږي، د روانې جون پر ۳۰ او د جولای په لومړۍ نېټه د دوحې درېیمه ناسته د ملګرو ملتونو په مشرۍ ترسره کېږي.
