له نږدې يوې مياشتې راهيسې په خواله رسنيو کې د اسلامي امارت مشرتابه ته منسوب داسې مکتوب لاس په لاس کېږي، چې په کې اړوند ادارو ته د غبرګولي له پيل راهيسې په دولتي ادارو کې د ښځېنه کارکوونکو معاشونه مطلق ۵ زره افغانيو ته راښکته کړي.
تر اوسه پورې اسلامي امارت د دې مکتوب په تړاو خلکو ته وضاحت نه دی ورکړی، خو شمشاد ته د يوه دولتي روغتون ډاکټرې تائيد کړې، چې ياد مکتوب رښتيا او په کې شوې لارښوونې د تطبيق په حال کې دي.
دغه ډاکټره که څه هم خپل مستعار نو ګل بيبي ښيي، خو د غږ او انځور د نه خپرېدو په شرط وايي:« ۳۵کاله کېږي، چې د ډاکټرې په توګه دنده اجرا کوم. د سرپرست حکومت په راتګ سره مو معاشونه کم شول، خو په هغې اندازې نه چې ستونزې مو حل نه کړي. خو اوس یو مکتوب راغلی، چې ۵زره افغانۍ د ټولو ښځینه کارکوونکو معاشونه به وي. موږ دې مکتوب ته اندېښمنې کړي یوو. دا ځکه چې ګونګ دی او دا په کې نه دې واضیح شوي، چې په دې کې کومې ښځېنه کارکوونکې شاملې دي؟ هغه چې په کور معاش اخلې یا ټولې؟ که څه هم دې اختر ته ټولو کارکوونکو معاشونه نه دې ورکړل شوي.»
دغه ډاکټره زیاتوي، د دې په ګډون هغه ښځې چې د کور سرپرستان نه لري، د سرپرست حکومت له لوري شوې پریکړې یې ژوند ننکولی.
هغه زیاتوي:« زما د کورنې غړي ۱۰ تنه دي. که زه ۵ زره افغانۍ واخلم څه ته یې ورسوم؟ ۳ یا ۳ نیم زره خو زما د لارې کرایه کېږي. نو دا یو نیم زر افغانۍ زه څه ته ورسوم.؟ که حساب وکړو، نو زه د ورځې په یوه روپۍ کار کوم نو په یوه روپې څه کېږي؟ څنګه چې مخکې مې له کار سره علاقه وه او د دې مکتوب په استولو سره له منځه تللې، نه یوازې چې له منځې تللي، بلکې منفي اغېزو یې زما د کورنۍ پر غړو هم اثر کړی دی. دا د کوم ځای عدالت دی؟ هغه کار چې ښځې يې کوي، نارینه یې هم کوي. د ښځو کار د نارېنهوو تر کار ډېر دی، نه کم، خو د ښځو معاشونه دې ۵ زرو افغانیو ته ښکته شي.که دا مکتوب عملي شي، دا به د کونډو او بې سرپرسته ښځو لپاره سخت تمام شي. دا ځکه چې د هغوی اولادونه ډوډۍ غواړي، ناروغېږي، لباس او نور څه دا بیا له کومه شي؟ اسلامي امارت په خپل دې فرمان سره اخلاقي فساد ته لاره او زمېنه برابر وي، دا ځکه چې یوه مور نه شي لېدلی، چې ماشومان یې له لوږې مړه شي.»
نوموړې وايي، د ښځينه کارکووکو د معاشونو کسر په تړاو د مکتوب له خپرېدو وروسته د معاشونو استحقاق جوړ او ماليې وزارت ته ولېږل شول، خو دې وزارت د ځېنو ښځينه کارکوونکو معاشونه اجرا نه کړل او تر امر ثاني د انتظار پاتې کېدو لارښوونه ورته شوې.
هغه زیاتوي:« کله چې استحقاقونه جوړ شول او مالیې وزارت ته ولیږل شول، هغوی ویل چې دا تر امر ثاني پورې ځنډیدلي دي.»
بلخوا یوې معتبرې سرچینې هم شمشاد ته تائید کړه، چې د وړمې شنبې په ورځ د ملالۍ زېږنتون او وزیر اکبر خان روغتونونو ښځينه روغتيايي کارکوونکو د دې مکتوب پر وړاندې کاري اعتصاب وکړ او زياتوي، يادو کارکوونکو ګواښ کړی، تر څو چې سرپرست حکومت کړې پرېکړه بېرته نه وي اخيستي، د ناروغانو درملنه نه کوي.
سرچېنه زیاتوي:« تېره شنبه د ملالۍ زیږنتون او وزیر اکبر خان روغتونونو کارکوونکو اعتراض وکړ، چې دوی به هېڅ یو مریض ونه ګوري، تر هغې چې یاده پرېکړه نه وي اخیستل شوي. وروسته د عامې روغتيا وزارت سرپرست راغی او ټولو ډاکټرانو څخه یې هیله وکړه، چې خپلو کارونو ته وګرځې او ژمنه یې وکړه، چې دا ستونزه به خپله د سرپرست حکومت له مشر سره شریکه کړي.»
په ورته وخت کې د عامې روغتیا وزارت دغه اعتراض سوی تفاهم بولي او نه مني، چې کاري اعتصاب دې شوی وي.
بل خوا پنځمه ورځ ده، چې د یاد فرمان په اړه د مالوماتو ترلاسه کولو په موخه له ماليې وزارت سره اړيکه کوو، خو مسوولین اړيکو ته ځواب نه ورکوي.
دا په داسې حال کې ده، چې په خواله رسنیو یو شمېر وېډیوګاني لاس په لاس کېږي او ښيي، چې په کې د اندرا ګاندي، وزیر محمد اکبرخان او ملالۍ زیږنتون ښځینه ډاکټرانو د معاش د کموالې په تړاو کاري اعتصاب کړی.
