چین له افغانستان سره د ښو اړیکو او مرستو دوام غواړي

په قطر کې د طالبانو د سیاسي دفتر ویاند ډاکتر نعیم پر خپل ټویټر لیکلي، د اسلامي امارت د سیاسي دفتر مرستیال شیر محمد عباس ستانکزي په دوحه کې د چین له سفیر زوجیان سره وکتل.

ډاکتر نعیم لیکلي، دواړو لوریو افغانستان کې پر روان سیاسي او امنیتي وضعیت او دوه اړخیزو موضوعاتو خبرې کړي دي.

ډاکتر نعیم د چین سفیر له قوله لیکلي، افغانستان کې نوي بدلون ته په مثبت نظر ګوري او زیاته کړې یې ده، چې نوی حکومت جوړول د افغانانو کار دی.

د چین سفیر زوجیان دغه راز ویلي، هېواد یې له افغانستان سره د ښو اړیکو او مرستو دوام ته ژمن دی.

زوجیان زیاته کړې، په اوس کې دوی له افغانستان سره د یوې اندازې بشري مرستو د لېږد اراده لري.