Skip to content
د کندهار امنیتي مسوولینو هغه راپورونه رد کړي، چې ګواکې په دغه ولایت کې د غلاوو او نورو جنايي پېښو کچه لوړه شوې ده.
د یاد ولایت امنیه قوماندان مولوي رحیم الله محمود وايي،ځينې کړۍ هڅه کوي،چې خلکو کې د اندېښنو د زیاتېدو په موخه د غلاوو او نورو جنايي پېښو کچه لوړه وښيي.
محمود وايي، حکومتي او امنیتي مسوولین توانېدلي، چې دغه ښار کې د امنیتي پېښو کچه د پخوا په پرتله څو برابره راټيټه کړي.
هغه زیاته کړه:« پیښې ډېرې کمې شوي دي. موږ هره ورځ راپور لرو، د اوپراسیون په نوم قوماندانۍ کې یوه اداره ده،چې دا د ټول ولایت پر کچه،د ولسوالیو د ښار پر کچه، د حوزو پر کچه راپورونه راټولوي، بیا یې کورنیو چارو وزارت ته ورکوي، نو دا د ټیلیفون له لارې،د وتس اپ له لارې، که د مخابرې، که د وړو مخابرو له لارې وي،که له هرې طریقې وي،موږ دا راټولوو. له موږ سره چې کوم مالومات دي، پیښې ډېرې کمې شوي دي.»
د کندهار ښار اوسېدونکي هم مني،چې په دغه ښار کې د پخوا پرتله د جنايي پېښو کچه ټيټه شوې ده، خو د لا ښه امنیت لپاره ځانګړې غوښتنې لري.
د کندهار ښار یو تن اوسېدونکی وايي:« خلک چې کله له کوره وځي، د خپلې اړتیا لپاره وسایل وباسي، په لاره کې ناوخته ترې اخیستل کیږي، په حوزو کې هم دغه کیسه ده،په ښار کې دغه وضعه ډېره خرابه ده. موږ له والي دا هیله لرو،چې خپل ځواکونو ته امر وکړي، چې د امنیت ښه والي په موخه ګزمې وکړي.»
خو د امنیه قوماندان مولوي رحیم الله محمود وايي،په ښار او ولسواليو کې يې امنیتي ګزمې او اړین تدابر زیات کړي دي.
ممود زیاتوي:« زموږ ګزمې ډېرې زیاتې شوي دي. په دې یوه اوونۍ سیارې ګزمې،پیاده ګزمې ۹۸۰ دي. موږ په یوه اوونۍ کې
۹۸۰ ګزمې کړې دي. موږ ۳۵۰ چیک پاینټونه کړي،چې هلته مجاهدین ولاړ ول، تلاشي او پوښتنې به یې کولې.»
امنیتي مسوولین همدا ډول زیاتوي،چې کندهار ښار او ولسوالیو کې یې د نشه یي توکو ګڼ پلورونکي نیولي او په ټولییز ډول هڅه دا ده،چې د نشه یي توکو د پلور کچه صفر شي.
