Skip to content
په سویل کې د پکتیا ولایت اریوب ځاځيو ولسوالۍ مسوولین وايي، په دغه ولسوالۍ کې هیڅ ډول امنیتي پیښه نه ده رامنځته شوې او د مخالفو وسله والو د موجودیت ادعاوې بې بنسټه ده.
د اریوب ځاځیو ولسوال ظاهر ګل وايي،د ولسوالۍ پر ټولو برخو بشپړ کنټرول لري او تر اوسه پورې د داسې وسله والو ګروپونو تائید نه شي کولای،چې د اسلامي امارت ضد کړنې دې ترسره کړي.
ظاهرګل زیاته کړه:« دا خبره هېڅ حقیقت نه لري.هیڅوک لیدل شوي نه دي. زمونږ ګزمې ۲۴ ساعته فعاله دي.»
د اریوب ځاځیو د استخباراتو مدیر هم په دغه ولسوالۍ کې د مقاومت او یا په نورو نومونو د اړوند وسله والو موجودیت نه مني او وایي،په اړه یې خپرې شوې ادعاوې حقیقت نه لري.
هغه زیاته کړه:« الحمد لله دلته یوه ډاډمنه فضاء ده. امنیت خوندي دی. تر اوسه پورې اریوب ځاځیو ولسوالۍ کې هېڅ ډول پیښه نه ده رامنځته شوې. هیڅ سیاسي پیښه نه لرو.کومو رسنیو چې څه خپاره کړي ول،هغه ټول دروغ ول.»
یو شمیر سرتیري هم اریوب ځاځیو ولسوالۍ کې د مخالفو وسله والو موجودیت ردوي او وایي، که فعالیتونه یې محسوس شي، پر وخت به له منځه یووړل شي.
اریوب ځاځیو ولسوالۍ کې یو تن سرتیری وايي:« دلته خو تر اوسه پورې هیڅ ډول پيښه نه ده رامنځته شوې. بیا هم که څه رامنځته کیږي، موږ یې ژر مخنیوی کولای شو.»
د اریوب ځاځیو ولسوالۍ کې یو بل سرتېری بیا داسې وايي:« که کوم څه رامنځته کیږي.زموږ امنیتي ځواکونو بشپړ چمتووالی لري،چې د هر ډول پیښې مخه په مېړانې سره ونیسي.»
څو ورځې وړاندې یو شمیر رسنیو له لوري داسې راپورونه خپاره شوي ول، چې اریوب ځاځيو ولسوالۍ کې یو شمیر مخالفو وسله والو فعالیتونه پیل کړي او په ځېنې اهدافو یې بریدونه ترسره کړي دي.
