Skip to content
د پکتیکا مرستیال والي حمدالله منیب له شمشاد سره د مرکې پرمهال وویل، د مرکز ښرنې اړوند په سپین څک سیمه د مرمرو قیمتي ډبرو کان ثبتیت شوی دی.
منیب وایي، د مرمرو دغه کان د یوه مسلکي ټیم له لوري تثبیت شوی او له کانونو او پټرولیم وزارت یې د لا زیاتو څېړنو غوښتنه کړې ده.
منیب زیاته کړه:« د ښرنې اړوند سپین څک سیمه کې د مرمر ډبرو یو کان تثبیت شوی دی. هلته زموږ له لوري یو مسلکي ټیم لېږل شوی او د دغه کان موجودیت رښتیا خبره ده.»
منیب له مرکزي حکومت غواړي،چې د مرمرو د دغه کان تر څنګ دې پکتیکا کې د کرومیټ او همدا راز د ځنې نورو کانونو قانوني کېندنۍ هم پيل کړي.
منیب وايي:« پکتیکا کې زیات کانونه موجود دي، له مرکزي حکومته او په ځانګړي ډول له کانونو او پټرولیم وزارت غواړو،چې دلته دې د کانونو د کېندنۍ په برخه کې پاملرنه زیاته کړي.»
پکتیکا کې هم د هیواد د نورو سیمو په څېر د بې روزګارۍ کچه لوړه ده او که په قانوني ډول د کانونو کېندنې پیل شي، زرګونه کسانوته د کار زمینه برابرېږي .
د پکتیکا یو تن اوسېدونکی وايي:« په پکتیکا کې کارونه نه شته دی. ډېره موده وشوه،چې بې روزګاره یو، د بې وزلۍ له امله له سردې بند ښرنې ته راغلي یو،خو دلته هم کار نه پیدا کېږي.»
د پکتیکا یو بل اوسېدونکی بیا داسې وايي:« اقتصادي ستونزې بیخي ډېرې دي،کارونه نه شته دی، خو دوی (اسلامي امارت) وايي، که پر رسمیت وپیژندل شي، دا ستونزې هواریږي. زموږ غوښتنه دا ده، چې کار راته پيدا شي.»
د پکتیکا ځایي مسئولین وایي، په ټولییز ډول یې دغه ولایت کې په ناقانونه ډول د کانونو د کېندنې او قاچاق مخنیوی کړی او چاته د خپلسرو کیندنو اجازه نه ورکوي.
