په سوېل کې د پکتیا اریوب ځاځیو اوسېدونکي وايي، په دغه ولسوالۍ کې د هېواد د نورو سېمو پر څېر د بې روزګارۍ کچه لوړه ده او که کان په قانوني ډول استخراج شي،ګڼو کسانو ته به د کار زمینه برابره شي.
د اریوب ځاځيو ولسوالۍ یو تن اوسېدونکی وايي:«حکومت باید د کان قانوني کېدو ته توجه وکړي او دا هم د حکومت مسوولیت دی،چې که په ناقانونه ډول استحراج کېږي، مخنیوی یې وکړي.»
د اریوب ځاځیو ولسوالۍ یو بل اوسېدونکی بیا وايي:« تېر حکومت کې خلک اردو او پولیسو کې مصروف وو، نوي حکومت تر اوسه پورې ورته د کار زمینه نه ده برابره کړې او دا کان باید په قانوني ډول استحراج شي.»
اریوب ځاځیو کې کرنیزې ځمکې کمې دي او د نورو سیمو په څېر دغه ولسوالۍ کې هم د بې روزګارۍ کچه لوړه ده، اوسېدونکي یې وايي، که کان په قانوني ډول استخراج شي، ګڼو کسانو ته به د کار زمینه برابره شي .
د اریوب ځاځيو ولسوالۍ یو تن بل اوسېدونکی بیا وايي:« د هر کار لپاره عملي اقدام په کار دی، که څه هم اسلامي امارت د کان قانوني استخراج په اړه پلان لري،خوهېله مو دا ده،چې د کاغذ پر مخ نه وي او عملي اقدامات وشي.»
بل پلو د اریوب ځاځیو ولسوال ظاهرګل وايي، د کان قانوني استخراج په اړه یې د خلکو عریضې تر لاسه کړي او نږدې راتلونکې کې به یې په قانوني ډول استخراج پیل شي.
ظاهر ګل زیاته کړه:« د شوکاڼي په اړه مو د خلکو عریضې تر لاسه کړي دي. اسلامي امارت یې په قانوني ډول د استخراج پلان لري او دا استخراج به نږدې راتلونکي کې پیل شي او خلک به په کې کار کوي.»
