د امریکا بهرنیو چارو وزارت مرستیال ویاند وېډانت پټېل د یوه خبري کنفرانس پر مهال ویلي، هېواد یې له وسله والو ډلو سره د مبارزې په برخه کې له پاکستان سره په منظم ډول په اړیکه کې دی.
پټېل په دې تړاو د یوې پوښتنې په ځواب کې ویلي، د سیمه ییز امنیت د څېړلو لپاره له پاکستاني چارواکو سره په ګډه خپل تعامل او دوه اړخیزو سلامشورو ته دوام ورکوي.
هغه زیاته کړې: « موږ د ډیورنډ فرضي کرښې ته څېرمه د وسله والو پر وړاندې عملیاتو کې د پاکستاني ځواکونو د مړینې پر راپورونو خواشیني یوو. تاسو سم وایي؛ موږ له پاکستاني چارواکو سره له ترهګرۍ سره د مبارزې د یوې برخې په توګه له هغوی سره په منظم ډول په اړیکه کې یوو او موږ به د سیمه ییز امنیت موضوع څېړلو ته دوام ورکړو، چې په کې پراخ تعامل ، د کاري کچې تعامل او د پراخو دوه اړخیزو سلامشورو مسالې هم په کې شاملې دي.»
پټېل ویلي، د سیمې امنیت څېړل له نږدې څاري او په دې برخه کې له پاکستان سره خپل ګډ کاري تعامل او ښکېلتیا ته دوام ورکوي.
د سیاسي چارو شنونکي پاکستان په سیمه کې د امریکا سټراټیژیک ملګری او د پلانونو مخته وړونکی هېواد او له افغانستانه په پاکستان کې د اهدافو د په نښو کولو تورونه او ادعاوې هم د ورته لویو پلانونو د عملي کولو یوه مهمه برخه ګڼي.
د سیاسي چارو شنونکی نازکمیر زیارمل وايي: « په اصل کې د امریکا د شومو استخبارتي اهدافو لپاره پاکستان ورته په سیمه کې غوره شریک دی. همدا پاکستان دی چې نږدې ۵۰ کاله کېږي د امریکا شوم اهداف په سیمه کې تعقیبوي او د امریکا د ګټو لپاره کار کوي. دا پنځه لسیزې کېږي چې امریکا خپل ټول هغه شوم اهداف چې د سیمې لپاره یې په نظر لري، دا که د خپلو رقیبانو د تهدید لپاره دي او که له هغوی سره د رقابت لپاره، دا ټول ورته پاکستان مخې ته وړي.»
ځېنې نور بیا په دې باور دي چې پاکستان په تېرو څو لسیزو کې د ترهګرۍ د روزنې او د همدې چارې د پرمخ بېولو لپاره په غیر مستقیم ډول له امریکا څخه مالي امتیازات اخېستي او له دې سره یې د سیمې ارامتیا، امنیت او ثبات له ګواښ سره مخ کړی.
دوی د ترهګریزو فعالیتونو د مرکز په توګه له ترهګرۍ څخه پاکستان ته د زیان اوښتو ادعاوې د تعجب او نه باور وړ ګڼي.
د سیاسي چارو شنونکی ادریس محمدي ځاځی وايي: « لومړی دا چې د دوی اداره د ترهګرو په روزلو کې لوی لاس لري او دویمه دا چې دوی په اوسني وخت کې د خپل حکومت، د خپل اقتصاد او د خپل سیاست په مدیریت کې ناکام دي او د همدې ناکامۍ لپاره بل څوک مدعي لټوي، څو د ملت او حکومت ترمنځ واټن پیدا نه شي.»
د ډیورند فرضي کرښې هغه غاړه د پښتونخوا او بلوچستان اړوند سیمو کې د وسله والو بریدونو د ترسره کېدو او په دې تړاو د افغان لوري د ښکېلولو په تړاو د پاکستاني چارواکو ادعاوې اوس تازه خبره نه ده، بلکې دا هغه څه دي چې په افغانستان کې د نوي نظام له جوړېدو وروسته دغه هېواد د خپلې پالیسۍ یوه برخه ګرځولې او له دې لارې یې یوه هڅه دا ده چې افغانستان د نړۍ تر سترګو د ترهګرۍ ملاتړۍ هېواد معرفي کړي.
