له تېرو درېیو کلونو راهیسې د ګڼو هېوادونو پوځي او سیاسي چارواکو په افغانستان کې د وسله والو ډلو پر شتون اندېښنه ښودلې او ادعا یې کړې، چې ترهګرو ډلو په افغانستان کې وده کړې، په داسې حال کې چې د سرپرست حکومت چارواکو په کراتو ویلي، د ترهګرو ډلو تنظیموونکي په افغانستان کې نشته، بلکي په خبره یې د سیمې په هېوادونو کې مېشت دي.
د روسیې ولسمشر ولادیمیر پوتین او د هند لومړي وزیر نرېندرا مودي په مسکو کې له کتنې وروسته، یوه ګډه اعلامیه خپره کړې چې په کې یې په افغانستان کې د ترهګرۍ ضد مبارزه هر اړخیزه او اغېزناکه یاده کړې.
پوتین او مودي دغه راز د افغانستان د وضعیت په اړه خبرو کې د افغانستان اوسنی سرپرست حکومت د خپلواک جوړښت په توګه ياد کړی.
د ګډې اعلامیې یوه برخه: « ولسمشر ولادیمیر پوتین او د هند لومړي وزیر نرېندرا مودي په مسکو کې له یو بل سره وکتل او دواړو په افغانستان کې د ترهګرۍ پر وړاندې د طالبانو مبارزه اغېزناکه وبلله او همداراز مودي او پوتین د افغانستان اوسنی حکومت یو خپلواک دولت وګڼه.»
د سیاسي چارو کارپوه سرور نیازی وايي: « د اسلامي امارت په راتګ سره د ترهګریزو ډلو په ځانګړې توګه داعش ډلې فعالیتونه په افغانستان کې کم شوي دي او ان دغه ډله د له منځه تلو په حالت کې ده. کله چې دلته امریکایان او ناټو وه، نو ډېرې لویې سیمې د داعش او نورو ترهګریزو ډلو تر ولکې لاندې وې؛ خو اوس په ټول افغانستان کې یو لوېشت خاوره هم د دوی په لاس کې نه ده او نه دوی دا ادعا کولی شي.»
په ورته مهال د افغانستان لپاره د روسیې ځانګړي استازي ضمیر کابلوف ویلي، د ممنوع ډلو یا تور لېست څخه د سرپرست حکومت لرې کولو لپاره د مسکو هڅې په ښه توګه روانې دي.
د سیاسي چارو کارپوهان له تورلېست د سرپرست حکومت لېرې کول د اړیکو پیاوړتیا لپاره مهم بولي او ټینګار کوي، چې هېوادونه دې هم د پرېکون سیاستونو پرځای له سرپرست حکومت سره خپلې اړیکې پراخې کړي، څو روانې کشالې او ستونزې حل شي.
د نړیوالو اړیکو کارپوه نجیب الرحمن شمال وايي: « د طالبانو د یو شمېر رهبرانو د تور لېسته د ایستلو په تړاو د روسانو هڅې د اړیکو د پراختیا او د ترهګرۍ پر وړاندې د اسلامي امارت د مبارزې په برخه کې د هغوی د لا زیاتې هڅونې لپاره یو نېک اقدام دی.»
که څه هم اسلامي امارت د پوتین او مودي د دغو څرګندونو په اړه څه نه وایي، خو له دې مخکې یې د روسیې دریځ ستایلی و او له ټولو هېوادونو سره یې د اړیکو پر پیاوړتیا ټینګار کړی و.
د سیاسي چارو کارپوهان د روسیې او هند اوسني درېځ ته د شک په سترګه ګوري او وایي، یاد هېوادونه د خپلو موخو د تعقیب لپاره ورته څرګندونې کوي.
د پوځي چارو کارپوه توریالی ځاځی وايي: « ماته د مودي، پوتین او نړۍ د نورو هېوادونو خبرې د منلو وړ نه دي، د دې لپاره چې همدې هېوادونو افغانستان له دې ستونزو سره مخ کړی و او مخ کړی یې دی. زه به هغه وخت د دوی خبرې ومنم چې دا د رسمیت پېژندنې موضوع دوی نوره ختمه کړي او افغانستان په رسمیت وپېژني، هغه وخت چې بیا دوی هر څه د افغانستان په تړاو ووايي ماته د منلو وړ دي.»
دا په داسې حال کې ده، چې پنځه ورځې وړاندې د روسیې ولسمشر ولادیمیر پوتین سرپرست حکومت د ترهګرۍ پر وړاندې مبارزه کې خپل متحدین وبلل او همدارنګه یې له افغانستان سره د اړیکو د پیاوړي کېدو لپاره د شانګهای همکارۍ د سازمان د تماس ډلې د فعالیت پر بېرته پیلولو ټینګار کړی و.
