په پکتیا کې ۹ زرو بې وزله کورنیو ته د چین بشري مرستو وېش لړۍ پيل شوه 

د افغانستان اسلامي امارت د کډوالو او بیرته راستنیدونکو چارو وزیر خلیل الرحمن حقاني د دغه مرستو د ویش پروګرام کې وویل، د  اسلامي امارت او عسکرو کورونیو ته په یو ډول رسېدنه کوي او اجازه به ورنه کړي،چې څوک چاته ستونزې جوړې کړي.

حقاني زیاته کړه:« افغانان ټول وروڼه دي، ټول مسلمانان دي،هېڅ کله به څوک هېر نه شي او نه به په یوه او بل نوم دوی ته څوک ستونزې جوړې کړي. باید په ټولییز ډول هڅه وشي،چې ټول سره لاسونه یو او خپل هېواد ته کار وکړو.» 

په ټولییز ډول د چین  بشري مرسته په څو پړاوونو کې شااوخوا ۹ زرو کورنیو ته ویشل کیږي او ګردیز ښار کې ۹۸۰ کورنیو ته خوراکي توکي وویشل شول .

د پکتیا کډوالو چارو  ریاست مشر صابرګل مصلح وايي:« ۹۸۰ وزله کورنیو ته په لومړي پړاوو کې دغه مرسته ګردیز ښار کې وویشل شوه. په  ټوله پکتیا کې به د چین مرسته ۹ زرو کورنیو ته ورسیږي.» 

د یو شمیر بې وزلو کورنیو غړي د بشري مرستو په عادلانه ویش ټینګار کوي او وایي، ډېری وخت اړمنو کورنیو ته نه رسیږي. 

د پکتیا یو تن  اوسېدونکی وايي:« که چېرته مرسته کوي،د شریعت په رڼا کې، لکه تاسو چې وویل ، باید مستحقو خلکو ته یې ورکړي ،هغه خلک چې بې وزله نه دي مه یې ورکوي. که سل ځله له تاسو سره په چوکۍ ناست وي.» 

د پکتیا یو بل اوسېدونکی بیا وايي:«د خلکو اقتصادي وضعیت بیخي خراب دی. دا شل کاله جنګونه تیر شوي دي،خلک په بد حالت کې دي،مرستې راځي،خو مستحقو خلکو ته نه ورکول کیږي او داسې خلک یې وړي،چې مستحق نه وي.» 

د کډوالو او بېرته راستنیدونکو چارو وزیر خلیل الرحمان حقاني هم په عادلانه ډول د مرستو پر ویش ټینګار کوي او وایي، په ټولییز ډول هڅه دا ده،چې مرستې اړمنو کورنیو ته ورسیږي.