د پکتیا ولایت امنیه قوماندانۍ مسوولین وايي، مرکز ګردیز کې د روږدو کسانو له را ټولیدو سره په ښار کې د غلا ، قتل او نورو جرمونو کچه خورا ټیټه شوې ده.
د یاد ولایت امینه قوماندانۍ ویاند عمر بدري وايي:« له کله نه چې موږ د ښار له بېلابېلو سیمو پر نشه یي توکو د روږدو کسانو را ټولول پیل کړي. ښار کې د غلا،قتل او چور چپاول پیښې بیخي صفر شوي دي.»
پر نشه یي توکو روږدي کسان یوه نیمه میاشت ساتل کیږي او دغه موده کې دیني زده کړې ورکول کیږي او د روږدو روغتون د ډاکترانو له لوري یې درملنه کیږي .
پکتیا کې د روږدو کسانو د درملنې روغتون ډاکتر موسی خان نورزي وايي:« د اسلامي امارت بې سرپناه معتادین را ټول کړي دي. دلته مو د درملنې ، ورزش او دیني زده کړو تر لاسه کولو زمینه ورته برابره کړې او دا روږدي کسان د ګردیز ښار او څیرمو ولسوالیو را ټول شوي دي.»
یو شمیر روږدي کسان خوشاله دي ،چې دلته د درملنې په موخه راوړل شوي او وایي، تر دې وروسته به نشه یي توکي نه کاروي.
پر نشه يي توکو یو تن روږدی وايي:«له تیرو پنځوسو ورځو مې باور وکړئ،که یو دود هم وهلی وي. اوس پوهیږم،چې سم سړی یم. مخکې خو به هر ډول نشه یي توکي په اسانه موندل کېدل.»
پر نشه يي توکو یو بل روږدی بیا وايي:« طالبان نه ظالمان دي نه بې رحمه دي، ښه خلک دي، د افغان بچیان دي، پر خلکو یې زړه سوزي. له اسلام او قران خبر خلک دي او له دغه بد بوټي مو منع کوي.»
