هرات کې د زعفران ګل مېلې لسم پړاو نندارتون پرانېستل شو. د دې نندارتون په ۷۲ غرفو کې د زعفرانو حاصلات د درېیو ورځو لپاره نندارې ته اېښودل شوي.
زعفران کاران وایي، روان کال کې د وچکالۍ له امله په افغانستان کې د زعفرانو حاصلات د تېر کال پرتله ۱۰ تر ۱۵سلنو کم شوي.
د افغانستان د زعفرانو ټولنې رییس محمد ابراهیم عادل وايي: « تېر کال مو ۴۰ ټنه زعفران لرل، خو سږ کال له ۱۵ تر۲۰ فیصدو کمښت لرو مګر بیا هم له ټولو ولسوالو او د زعفران کارانو له ټولنو څخه زموږ رسمي معلومات ښيي چې سږ به هم له ۴۰ ټنو پورته زعفران ولرو. د دې لامل دی چې د زعفرانو تر کښت لاندې ساحه ډېره شوې.»
د زعفرانو کروندګر نعمت الله وايي: « هغه ستونزه چې کروندګر او زعفران کاران ورسره مخامخ دي، د زعفرانو اړوند ځمکه ده. سږ کال کروندګر بریالي نه شول چې له خپلو ځمکو د تمې وړ حاصل ترلاسه کړي. د دې کار لامل اقلیمي ستونزې دي.»
په ورته مهال د کرنې، اوبولګولو او مالدارۍ وزارت مسوولین د زعفران کارانو د ملاتړ او بهر ته د زعفرانو د صادراتو زمینې برابرولو ډاډ ورکوي.
د دوی په خبره، سږ کال په هېواد کې د زعفرانو کښت کچه له ۹ زرو هکټارو څخه ۱۲ زره هکټارو ته لوړه شوې او په پام کې ده چې۴۰ ټنه زعفران ترې ترلاسه شي.
د کرنې، اوبو لګولو او مالدراۍ وزارت د کرنې او مالدارۍ معین صدراعظم عثماني وايي: « د افغانستان اسلامي امارت د دې اتحادیې د ملاتړ او همدارنګه د بزګرانو او صادروونکو ټولنو د ملاتړ ډاډ ورکوي.»
بله خوا، د هرات ځایي چارواکي د اقلیمي بدلونونو او وچکالیو له امله د اوبو کمښت د کرنې راتلونکي لپاره د اندېښنې وړ بولي او له کروندګرو غواړي چې د اوبو سپمولو هڅې وکړې.
هرات والي نور احمد اسلام جار وايي: « که زموږ کروندګر له دغو اقلیمي شرایطو سره ځان برابر نه کړي، زیان کوي او خپلې ځمکې به له لاسه ورکړي. که دا خبره نه منی، نو د فراه ولایت له خلکو پوښتنه وکړئ. هلته هر کال خلک د وچکالیو له امله له خپلو کلیو او کورونو کډه کوي.»
هرات د افغانستان ۹۰ سلنه زعفران تولیدوي او د رسمي شمېرو له مخې، شاوخوا ۴۰ زره کسان په دې ولایت کې د زعفراڼو پر کرکیله بوخت دي.
