هرات ښار چې په کې یوازې د ۵ زره رېکشو د تګ راتګ ظرفیت شته، خو اوس په کې شاوخوا ۱۰۰ زره رېکشې چلېږي.
د نقليه وسايطو او په ځانګړې توګه د رېکشو دې بې ساري زياتوي له امله په ښار کې ګڼه ګوڼه خورا زياته شوې او خلک يې له ستونزو سره مخ کړي دي.
تازه د هرات ټرافیکو مدیریت وایي، د ښار پر مرکزي سړکونو چې د مستوفیت له څلورلارې پیل تر خواجه کله سیمې پورې رسېږي، د رېکشو پر تګ راتګ بندیز لګېدلی او غواړي له دې وروسته هرات ښار کې د رېکشو د وارداتو او بسته بندۍ مخنيوی هم وکړي.
د هرات ټرافیکو مدیر شېرمحمد حجازي وايي: « هرات ښار نور د رېکشو ظرفیت نه لري. دلته ۵۰۰۰ رېکشې ثبت شوې دي، خودا هم ښار ته په کتو ډېرې دي. دا مهال هرات ښار کې شاوخوا ۱۰۰ زره رېکشې چلېږي چې له حده زیاتې دي.»
د نقلیه وسایطو ترڅنګ، د سړکونو پر سر د غیرمعیاري تمځایونو او پارکینګونو شتون هم د تګ راتګ پرمهال خلکو ته ستر سرخوږی جوړ کړی.
د هرات ښاروالۍ مسوولان وایي، د نظم ټينګښت لپاره ياد تم ځايونه تړي، خو له موټر چلوونکو هم غواړي چې د سړکونو پر سر دې موټر نه دروي.
د هرات ښاروالۍ د ښاري حکومتولۍ رییس عبدالاحد رحماني وايي: « د ښاري نظم او انسجام کمیسیون صلاحت لري چې له پارکېنګ نیولې تر رېکشاګانو، زرنجانو او موانعو پورې له مخې لرې کړي. همدارنګه هغه تم ځایونه چې په غیر معیاري توګه جوړ شوي، ټول به له منځه یوړل شي. له خلکو غوښتنه کوم چې خپل نقلیه وسایط په معیاري او خوندي پارکېنګونو کې ودروي.»
د هرات اوسېدونکي دلته د نظم ټینګښت او ګڼه ګوڼې کمښت په برخه کې د اړوند مسوولینو هڅې ستايي او د ورته پروګرامونو په دوام، د ښاري سړکونو پر پراختیا ټینګار کوي.
د هرات اوسېدونکی میرویس راشد وايي: « که تاسو ښار ته یو نظر وګورئ، وبه وینئ چې لارې ټولې د رېکشاګانو او درې ټایره وسایطو له خوا بندې شوې دي. که ښاروالي دغه شان پروګرامونو ته ادامه ورکړي، ښار به ورسره منظم او تګ راتګ به اسانه شي.»
د هرات اوسېدونکی احمد وايي: « که پارکېنګونو ته مناسب ځایونه جوړ شي او د ښار له مخې پاک شي، دا به ډېر ښه وشي. همدا اوس شل سلنه پارکېنګونه د سړکونو پر سر، د رسټورانټونو مخې او نورو نا مناسبو ځایونو کې جوړ شوي دي.»
د هرات ښاري نظم او انسجام کمیسیون مسوولینو په خبره، هرات ښار کې به د سړکونو پر سر اېښودل شوي موانع هم لرې کړي، ترڅو ښار کې خلګو ته تګ راتګ اسان شي. دوی د دې پلانونو پلي کولو په برخه کې د ښاريانو پر همکارۍ ټینګار کوي.
