هبت الله په تازه خپاره کړي پیغام کې ویلي، له هغو افغانانو سره دې مرستې وشي،چې د سیاسي او اقتصادي ستونزو په پلمه هېواد پرېږدي.
د هبت الله د پیغام یوه برخه:« غربي هېوادونو ته تلونکي افغانان د اوسیدو د جواز په خاطر د اسلام او اسلامي نظام خلاف تهمت او جعلي اسنادو برابرولو ته اړ کېږي او هلته په عادي او ان په ځنو حقیرو چارو کې ورته دنده پیدا کېږي.له دې امله دې واليان، اړوند مسوولین او علماء کرام له یادو کسانو سره مخامخ وګوري،د هغوی ستونزې دې واوري او د ممکنه حل لارو په پیدا کولو کې دې ورسره مرسته وکړي.»
شنونکي دغه پیغام یو نیک او مثبت اقدام بولي،چې پر ملي او نړیواله کچه به مثبت غبرګونونه ولري.
دوی وایي، بل پلو به هغه هېوادوالو ته ډاډ پیدا شي، چې له وېرې جلا وطنۍ ته اړ شوي دي.
د سیاسي چارو شنونکی غلام حضرت احساسوايي:« دا یو ډېر نیک او مثبت اقدام دی. دا به هم په ملي او هم پر نړیواله کچه مثبت انعکاسات ولري،دا به زموږ یو شمېر هغه هېوادوالو ته نسبي ډاډ ورکړي،چې په اوسني نظام ډاډه شي،چې دا نظام د ولس لپاره او د راتلونکې هوسا ژوند لپاره تدابیر لري.»
خو ځنې نور بیا یوازې دغه ډول پیغامونه د حل لاره نه بولي او وړاندیز کوي،چې اسلامي امارت د خلکو اندېښنو او ستونزو حل لپاره باید عملي اقدامات وکړي.
د سیاسي چارو شنونکی ویس ناصري وايي:« اوسنی حالت او اوسنی حاکمیت لامل شوی،چې خلک، ځوانان او شتمنۍ له هېواده ووځي.»
هبت الله ویلي، غربي هېوادونو ته تلونکي افغانان د لارې په اوږدو او د کډوالو پندغالو کې له ناوړه حالاتو سره مخ کېږي،چې د خپلوانو د خفګان لامل ګرځي او دغه راز د ځینو مغرضو برنامو له مخې عقائد، اخلاق او معنوي ارزښتونه یې هم له خطر سره مخ کېږي.
دغه راز نوموړي ولایتي مسوولینو ته د امنیتي تدابیرو د لازیاتوالي او د خلکو اندېښنو حل سپارښتنه شوې ده.
