د ټرافیکي پېښو د مخنیوي او له امله یې د مرګ ژوبلې کمولو په موخه، ننګرهار کې له موټرو د لیزري څراغونو د لرې کولو کمپاین پیل شو.
د ننګرهار امنیې قوماندانۍ مسوولین وايي، د دې کمپاین موخه موټر چلوونکو ته د شپې له خوا سفر پرمهال د اسانتیاوو برابرول او د ټرافیکي پېښو مخنيوی دی.
دوی زیاتوي، دغه کمپاین به تر هغې ادامه ولري چې ننګرهار کې له ټولو موټرو لیزري څراغونه لرې شي.
د ننګرهار امنیې قوماندانۍ مرستیال مولوي محمد طاهر مبارز وايي: « هر هغه څه چې هېوادوالو ته ضرر وي او د هېوادوالو ژوند له خطر سره مخامخ کوي، دا د حاکم نظام مسوولیت دی چې رفع یې کړي. یو له دغو ضررونو هم لایزي څراغونو موجودیت دی؛ ځکه چې اکثریت د موټرو د ټکر او زموږ د هېوادوالو د مرګ ژوبلې سبب کېږي. موږ خپلو مجاهدینو ته امر کړی چې هېچاته اجازه ورنه کړي، ترڅو پر خپل موټر لایزري څراغونه ولګوي او د خلکو ژوند له خطر سره مخ کړي.»
د ننګرهار امنیې قوماندانۍ مرستیال دغه راز وايي، د روان کال له پیل راهیسې د جلال اباد په مختلفو سیمو او همدارنګه ننګرهار ته د غځېدلو لارو په اوږدو کې ۱۴۲ ټرافیکي پیښې رامنځته شوې چې له امله یې شاخوا۱۵۰ تنو ته مرګ ژوبله اوښتې.
مبارز زیاتوي: « د ننګرهار ولایت امنیې قوماندانۍ د ټرافیکو مدیریت په تېر یوه کال کې، ۱۴۲ پېښې څېړلې دي. په دغو ټرافیکي پېښو کې ۹۶ تنه هېوادوال شهیدان شوي او ۴۶ نور ټپیان شوي دي.»
په همدې حال کې موټر چلوونکي د ټرافيکي پېښو د مخنيوي لپاره تازه پيل شوی کمپاين مهم ګڼي او د کمپاين ترڅنګ د موټر چلولو پرمهال پر احتياط هم ټينګار کوي.
موټر چلوونکی اسامه وايي: « کله چې لایزري څراغ لرونکی موټر مخامخ را روان وي، هېڅ لاره نه درته ښکاري. موږ په دې کمپاین ډېر خوښ یو، دا دی وګورئ یو څراغ یې زما هم لرې کړ. لایزري څراغونه حتی له موږ ډرېورانو هم لاره ورکوي، نابلد کسان خو بیخي ورسره تکلیف وي.»
یو بل موټر چلوونکی عزیز الله وايي: « لایزري څراغونه د ټرافیکو په قانون کې منع دي، ځکه چې د مقابل طرف ډرېور سترګې اخلي او له امله یې حادثه کېږي. د ټرافیکو له مدیریت غوښتنه کوو چې دغه څراغونه له موټرو وباسي، باید ټول څراغونه ساده شي، ترڅو ډرېوران په آرامه موټر وچلوي.»
د ننګرهار اوسېدونکي ټینګار کوي، که د لیزري څراغونو د لرې کولو او همدارنګه د موټر چلوونکو پر احتیاط سربېره، سرپرست حکومت د سړکونو پراختیا ته هم پاملرنه وکړي، ښايي ټرافیکي پېښې ورسره د پام وړ کمې شي.
