د امریکا د مرکزي قومندې قوماندان کېنټ مک کېنزي له اسوشیټیډ پریس خبري آژانس سره په یوه مرکه کې ویلي، افغانستان ته له ګاونډیو هېوادونو بهرني وسله وال ور مات شوي او اندېښنه یې ښودلې چې القاعده شبکه به په دې هېواد کې خپل فعالیتونه پراخ کړي.
مک کېنزي زیاتوي:« القاعده په افغانستان کې خپل شتون او پیاوړتیا ورځ تر بلې زیاتوي او پراخوي یې. ترهګر د افغانستان له پولو دغه هېواد ته ننوځي او دا کار په معمول ډول دوام لري.»
خو د ا فغاستان اسلامي امارات بیا دا ادعاوې ردوي او افواهات یې بولي او زیاتوي،چې د افغانستان ټول سرحدات د امارت ځواکونو ترجدي څار لاندې خوندي دي.
د اسلامي امارات د ویاند مرستیال بلال کریمي وايي:«اسلامي امارات له خپلو ځمکنیو حقایقو تر هرچا زیات خبر دي. دا موږ ردو،ځکه زموږ د هېواد پولې تر هر بل وخت اوس ډېرې خوندي دي. د اسلامي امارات مجاهدین پر ټولو سیمو حاکم دي او هېڅ داسې ډله نه شته دی.»
مک کېنزي د ترهګرو پر وړاندې د طالبانو پر مبارزې هم شک ښودلی او تور یې پورې کړی دی،چې طالبان تر اوسه پورې خپل منځي جنجالونو کې ګېر دي.
مککېنزي زیاته کړې:«موږ به راتلونکې دوه میاشتې هم وګورو،چې طالبان له القاعدې سره د مبارزې په برخه کې څه کوي. خو ګومان نه کوم،چې طالبان دې دا کار وکړای شي،ځکه هغوی پخپل منځي مذاکراتو او مسایلو کې بوخت دي.»
مک کینزي وايي، القاعده به تر راتلونکو دوه کلونو دومره پیاوړې شي،چې له افغانستانه بهر بریدونه وکړي،خو اسلامي امارت د ویاند مرستیال بلال کریمي بیا وايي،د دوحې هوکړې عمل ته ژمن دي او چاته اجازه نه ورکوي،چې له افغان خاورې ګواښ پیښ کړي.
کریمي زیاتوي:«اسلامي امارت سنجیده او خپلو تعهداتو ته ژمن دی او لکه څنګه چې یې د دوحې په هوکړه لیک کې ډاډ ورکړی وو،چې د افغانستان خاوره به د چا په ضرر نه تمامیږي. هماغه تعهد ته اسلامي امارت ژمن دی.»
